समस्यामा पुष्प व्यवसायी, उत्पादित फूल गाईवस्तुलाई
<p>काठमाडौं। लकडाउनमा उत्पादित फूल बिक्री गर्न नपाएपछि पुष्‍प व्यवसायी समस्यामा परेका छन्।</p>
<p>सरकारले लकडाउन खुकुलो बनाउने निर्णय गरेका ४३ वटा क्षेत्रका पुष्‍प व्यवसाय परेन । उत्पादित फूल गाईवस्तुलाई खुवाउनुको विकल्प नभएको फ्लोरिकल्चर एसोसिएसन नेपालका अध्यक्ष कुमार कसजु श्रेष्‍ठले बताए।</p>
<p>एसोसिएसनका अनुसार लकडाउनले पुष्‍प व्यवसायमा दैनिक एक करोड २५ लाख रुपैयाँ क्षती हुँदै आएको छ।</p>
<p>यस व्यवसायमा साढे ६ अर्ब रुपैयाँभन्दा बढीको लगानी छ । प्रत्यक्ष र अप्रत्यक्ष गरी ४१ हजारभन्दा बढीले रोजगारी पाएका छन्। ४३ जिल्लाका एक हजारभन्दा बढीले व्यावसायिक फूल खेती गर्छन् ।</p>
<p>करिब २० हजार जनाले प्रत्यक्ष र बाँकीले अप्रत्यक्ष रोजगारी पाएको श्रेष्‍ठले बताए ।</p>
<p>नेपालमा उत्पादित फूलले नेपाली बजारको ९० प्रतिशत माग धान्दै आएको व्यवसायीहरू बताउँछन्। उनीहरूका अनुसार फूलका बिरुवा पनि सिँचाइ अभावमा सुक्न थालेका छन् ।</p>
<p>लकडाउनमा सवारी आवागमनको अत्यावश्यक पास उपलब्ध नहुँदा सिँचाइ र सामान्य व्यवस्थापनको काम गर्न पनि नपाएको उनीहरूको गुनासो छ।</p>
<p>लकडाउन खुलेपछि पुनः नर्सरी र फार्महरू सञ्चालनमा ल्याउने अवस्था नरहेको श्रेष्‍ठको भनाइ छ। “फार्महरूलाई पुरानै अवस्थामा फर्काउन ठूलो रकम लगानी गर्नुपर्नेछ,” उनले भने।</p>
<p>सरकारले आगामी वर्षमा यस क्षेत्रलाई प्राथमिकतामा नराखे पुष्‍प व्यवसायीहरू पलायन हुने सम्भावना रहेको उनले बताए ।</p>
प्रतिक्रिया दिनुहोस्
.jpg)
