कारोबार खुलेको दुई दिनमै फेरि अनिश्चितकालका लागि बन्द भयो शेयर बजार
<p>काठमाडौं। कारोबार खुलेको दुई दिनपछि नै शेयर बजार फेरि अनिश्‍चितकालका लागि बन्द भएको छ।</p>
<p>धितोपत्र बोर्डले नेपाल स्टक एक्सचेन्‍ज (नेप्से)लाई बजार बन्द गर्न निर्देशन दिएसँगै शेयर बजारको कारोबार फेरि बन्द भएको हो।</p>
<p>डेढ महिनादेखि लगातार बन्द रहेको बजार २९ र ३० वैशाखमा खुलेको थियो।</p>
<p>तर, नेप्से परिसूचक लगातार घटेपछि फेरि बन्द गरिएको हो। कारोबार भएको दुई दिन नै नेप्सेमा नेगेटिभ सर्किट ब्रेक लागेको थियो।</p>
<p>नेप्सेका प्रमुख कार्यकारी अधिकृत चन्द्रसिंह साउदले बोर्डको निर्देशन आएपछि आजैदेखि बजार बन्द भएको बताए।</p>
<p>उनले कोरोना भाइरस (कोभिड-१९)को संक्रमण बढ्दै गएपछि बजार बन्द गर्ने निर्णय धितोपत्र बोर्डले गरेको बताए।</p>
<p>“अहिलेसम्म स्थिति नियन्त्रणमा थियो। तर, पछिल्लो दुई दिनमा संक्रमितको संख्या बढेपछि सरकारले पनि लकडाउनलाई कडा गरेको छ। सोही कारण बजार बन्द गरिएको हो,” उनले भने ।</p>
<p>शेयर बजारका लगानीकर्ताहरूले बजार खोल्नुपर्ने माग राखेपछि धितोपत्र बोर्डले कारोबार सञ्‍चालन गर्ने निर्णय गरेको थियो।</p>
<p>तर, कारोबार खुलेको दुई दिन नै नेगेटिभ सर्किट लागेर बजार बन्द भएपछि लगानीकर्ताहरू नै बजार बन्द गराउन लागिपरेका थिए।</p>
<p>यसअघि पनि लगानीकर्ताहरूले नै शेयर बजारको कारोबार बन्द गर्नुपर्ने भन्दै नेप्सेलाई दबाब दिएका थिए।</p>
प्रतिक्रिया दिनुहोस्
.jpg)
