विश्व व्यापार संगठनका महानिर्देशकको अप्रत्यासित राजीनामा, ट्रम्पले भने- ‘उपयुक्त निर्णय’
<p>जेनेभा। विश्व व्यापार संगठन (डब्ल्यूटीओ)का महानिर्देशक रोबर्टो अजिभिडोले पदबाट राजीनामा दिएका छन्।</p>
<p>डब्ल्यूटीओको प्रमुख अजिभिडोले आफ्नो कार्यकाल सकिन एक वर्ष बाँकी रहँदै हिजाे पदबाट अप्रत्यासितरूपमा राजीनामा दिएको <em>न्यूयोर्क टाइम्स</em>ले बताएको छ।</p>
<p>अमेरिकी राष्ट्रपति डोनाल्ड ट्रम्पको आलोचनाको शिकार भइरहने अजिभिडोको कार्यकालको समय सन् २०२१ सम्मको थियो।</p>
<p>चार वर्षे अवधिको दोस्रो कार्यकाल सम्हाल्दै आएका अजिभिडोले ३१ अगस्टदेखि लागू हुने गरी राजीनामा दिएका हुन्। उनी विगत सात वर्षदेखि डब्ल्यूटीओको प्रमुखको भूमिकामा थिए।</p>
<p>ब्राजिली अर्थशास्त्री अजिभिडोको नेतृत्वको डब्ल्यूटीओविरुद्ध ट्रम्प प्रशासनले निरन्तर आलोचना गर्दै आएको थियो।</p>
<p>ट्रम्प प्रशासनले अजिभिडोको नेतृत्वमा रहेको व्यापार संगठनले चिनियाँ व्यापार व्यवसायमा चीन सरकारले नियमविपरीत दिइरहेको सरकारी अनुदानलाई आँखा चिम्लेको आरोप लगाउँदै आएको थियो।</p>
<p>अमेरिका र चीनबीचको व्यापार युद्ध जारी रहेको तथा कोरोना भाइरसका कारण विश्व अर्थतन्त्रमा व्यापक असर परिरहेको समयमा उनको राजीनामा आएको हो।</p>
<p>प्रमखु अजिभिडोले व्यक्तिगत कारण देखाउँदै राजीनामा गर्नुअघि डब्ल्यूटीओको २५ वर्षे इतिहासमा अन्य कुनै प्रमुखले कार्यकाल बाँकी छँदै राजीनामा दिएका थिएनन्।</p>
<p>यद्यपि अमेरिकी राष्ट्रपति डोनाल्ड ट्रम्पले अजिभिडोको निर्णय उपयुक्त भएको बताएका छन्।</p>
<p>उनले विश्व व्यापार संगठनले पछिल्लो समय अमेरिकालाई नराम्रो व्यवहार गरिहेको बताए।</p>
प्रतिक्रिया दिनुहोस्
.jpg)
