औद्योगिक पूर्वाधार विकासलाई तीव्रता दिइने
<p>काठमाडौं। सरकारले आगामी आर्थिक वर्षमा औद्योगिक पूर्वाधार विकासमा विशेष ध्यान दिने घोषणा गरेको छ।</p>
<p>कोरोना भाइरस (कोभिड-१९) पछिको नेपाली अर्थतन्त्रलाई उकास्न सरकारले औद्योगिक उत्पादन बढाउने गरी औद्योगिक पूर्वाधार विकासमा जाेड दिने भएकाे हाे।</p>
<p>आगामी आर्थिक वर्षको नीति तथा कार्यक्रमको घोषणा गर्दै राष्ट्रपति विद्यादेवी भण्डारीले स्थानीय तहहरूसँगको सहकार्यमा औद्योगिक ग्रामको स्थापना गर्ने बताइन्।</p>
<p>राष्ट्रपति भण्डारीले स्थानीय आवश्यकता र सम्भावनाका आधारमा धेरैभन्दा धेरै औद्योगिक ग्राम स्थापनातर्फ लाग्ने बताइन्।</p>
<p>बाँकेको नौवस्ता, हेटौंडाको मयुरधाप, झापाको दमक, बुटवलको मोतीपुर, कैलालीको चुहा तथा कञ्चनपुरको दैजी र वेदकोट औद्योगिक क्षेत्र निर्माण कार्यलाई तीव्रता दिइनेछ।</p>
<p>त्यसैगरी, सरकारी स्वामित्वमा रहेको बन्द तथा रुग्ण उद्योगहरूलाई निजी क्षेत्रसमेतको उपस्थितिमा पुनः सञ्चालन गर्ने तयारी सरकारले गरेको छ।</p>
<p>खाद्य, कृषि तथा वनजन्य वस्तुहरूको प्रशोधन, औषधि र स्वास्थ सामग्री तथा स्वदेशी कच्चा पदार्थको प्रयोग गरेर उत्पादनमूलक उद्योगको स्थापनामा प्रोत्साहन गर्ने उल्लेख गरिएको छ।</p>
<p>औद्योगिक व्यवसाय प्रवर्द्धन गर्न राष्ट्रिय उत्पादनका लागि एकीकृत संस्थाको रूपमा सञ्चालन गर्ने, विश्वविद्यालयहरूसँग सहकार्य गरेर विश्वविद्यालयस्तरमा दक्ष जनशक्ति उत्पादनको सीप, तालिम तथा पढाइ शुरू गरिने बताइएको छ।</p>
<p>प्रदेश र स्थानीय तहसँगको समन्वयमा स्थानीय स्रोत र साधानको उपयोग गरेर रोजगारी, कृषि प्रशोधन गर्न लघु, घरेलु साना तथा मझौला उद्योग स्थापना गर्न प्रोत्साहन गर्ने तयारी सरकारको छ।</p>
<p>एक बिन्दु सेवा केन्द्रलाई थप विकास गर्ने र स्वदेशी तथा विदेशी लगानीलाई अभिवृद्धि गर्ने बताइएको छ।</p>
<p>कम्पनी दर्ता वा खारेजी प्रक्रियालाई छिटोछरितो बनाइनेछ। नेपालमा उत्पादित वस्तु र आयातित वस्तुको गुणस्तर मापनमा ध्यान दिइनेछ।</p>
प्रतिक्रिया दिनुहोस्
.jpg)
