तेस्रो मुलुकसँगकाे व्यापारका लागि चीनका सात बन्दरगाह प्रयाेग गरिने
<p>काठमाडौं। सरकारले आगामी आर्थिक वर्षमा चीनका सात बन्दरगाहको प्रयोग गरेर तेस्रो मुलुकसँगको व्यापार गर्ने नीति लिएको छ।</p>
<p>गत वर्ष नेपालले चीनका चार सामुद्रिक बन्दरगाह र तीन स्थल बन्दरगाह तेस्रो मुलुकसँगको व्यापारका लागि प्रयोग गर्न पाउने गरी पहुँच पाएको थियो।</p>
<p>तर, हालसम्म चीनको बन्दरगाह प्रयोग गरेर तेस्रो मुलुकबाट सामान आयात तथा निर्यात गरिएको छैन।</p>
<p>आज आगामी वर्षको नीति तथा कार्यक्रमको घोषणा गर्दै राष्ट्रपति विद्यादेवी भण्डारीले आगामी वर्ष चीनको बन्दरगाह प्रयोग गरेर तेस्रो मुलुकसँग व्यापार गर्ने बताइन्।</p>
<p>त्यसैगरी सरकारले आगामी आर्थिक वर्षमा व्यापारिक पूर्वाधारको विकासमा थप जोड दिने भएको छ।</p>
<p>सरकारले भारततर्फ नेपालगञ्जमा एकीकृत जाँचचौकी निर्माण गर्ने, कैलालीको हरैयामा व्यापार विशेष क्षेत्र र कञ्चनपुरको दोधारा चाँदनीमा सुक्खा बन्दरगाह बनाउने भएको छ।</p>
<p>यस्तै चीनतर्फ हुम्लाको यारी, मुस्ताङको कोरला, संखुवासभाको किमाथांका, ताप्लेजुङको ओलाङचुङगोलामा व्यापारिक पूर्वाधार विकासको सम्भाव्यता अध्ययन गर्ने भएको छ।</p>
<p>साथै रसुवाको टिमरेमा बन्दै गरेको सुक्खा बन्दरगाह आगामी आर्थिक वर्षमा सक्ने र काठमाडौंको चाेभारमा बन्दै गरेको बन्दरगाह आगामी दुई वर्षभित्र सक्ने तयारी गरेको छ।</p>
<p>यसका साथै निर्यात लागत कम गर्न निर्यात गृह स्थापना गर्ने र एक प्रकारका वस्तु उत्पादन गर्ने उद्योगीहरूको समूह बनाएर निर्यातमा प्रोत्साहन गर्ने घोषणा गरिएकाे छ।</p>
प्रतिक्रिया दिनुहोस्
.jpg)
