लकडाउनको मोडालिटी र अवधिबारे छलफल गर्न उच्चस्तरीय समितिको बैठक बस्दै
<p>काठमाडौं। पर्सि, ६ जेठदेखिको लकडाउनको मोडालिटी र अवधिबारे छलफल गर्न कोरोना संक्रमण रोकथाम तथा नियन्त्रण उच्चस्तरीय समितिको बैठक बोलाइएको छ।</p>
<p>आज दिउँसो साढे २ बजे सिंहदरबारस्थित प्रधानमन्त्री तथा मन्त्रिपरिषद्को कार्यालयमा बैठक तय भएको उपप्रधानमन्त्री एवं समितिका संयोजक ईश्वर पोखरेलको सचिवालयले जनाएको छ।</p>
<p>कोरोना भाइरस संक्रमण फैलिन नदिन ११ चैतदेखि जारी लकडाउनको पछिल्लोपटक थपिएको अवधि भोलि, ५ जेठबाट सकिँदैछ।</p>
<p>संक्रमितको संख्या दिनदिनै बढिरहेको र हिजो मात्र कोभिड-१९ बाट एकजनाको मृत्यु समेत भएको सन्दर्भमा आउँदा दिनको सम्भावित भयावह अवस्थाको आंकलन गर्दै लकडाउनको अवधि कति दिन थप्‍ने र मोडालिटी कस्तो हुनेबारे बैठकमा छलफल हुने बताइएको छ।</p>
<p>२ जेठमा समितिले स्वास्थ्य क्षेत्रका विज्ञहरूसँग छलफल गरेर जोखिम क्षेत्र छुट्याएर लकडाउनको मोडालिटी परिवर्तन गर्ने गरी मन्त्रिपरिषद्लाई सिफारिस गर्ने तयारी गरेको प्रधानमन्त्री तथा मन्त्रिपरिषद् कार्यालयका सचिव नारायण विडारीले बताएका थिए।</p>
<p>आजको बैठकमा लकडाउनको समीक्षा गर्दै कति दिन लम्ब्याउने र स्वरूप कस्तो बनाउने भन्नेबारे समितिले निर्णय गरी सरकारलाई सिफारिस गर्नेछ।</p>
प्रतिक्रिया दिनुहोस्
.jpg)
