गृह मन्त्रालयले भन्याे- ‘स्वास्थ्यकर्मीमाथि दुर्व्यवहार गरे हदैसम्मकाे कारबाही गरिनेछ’
<p>काठमाडौं। गृह मन्त्रालयले सुरक्षा सतर्कताका नाममा अग्रपंक्तिमा रहेर काम गरिरहेका स्वास्थ्यकर्मीलगायतमाथि हुने अवाञ्छित क्रियाकलापमा संलग्न कुनै पनि व्यक्तिलाई हदैसम्मको कारबाही गरिने जनाएको छ।</p>
<p>स्वास्थ्यकर्मीहरूलाई घरबाट निकाल्ने, दबाब दिने, आवागमनका क्रममा दुर्व्यवहार गर्ने, कानूनविपरीतका कामहरू गर्ने क्रम देखिएको भन्दै गृह मन्त्रालयले गम्भीर ध्यानाकर्षण भएको जनाएको छ।</p>
<p>गृह प्रवक्ता केदारनाथ शर्माले आज विज्ञप्ति जारी गर्दै कुनै पनि अवाञ्छित गतिविधिहरू कुनै पनि निकाय वा व्यक्तिहरूबाट नगर्नु/नगराउन अनुरोध गरेका छन्।</p>
<p>स्थानीय केही व्यक्तिहरूबाट स्वास्थ्य सुरक्षा सतर्कताको नाममा बाटो बन्द गर्ने, टोल प्रवेश निषेध गर्ने, आवागमनमा बाधा पुर्‍याउने, घरभाडामा बसिरहेका व्यक्तिहरूलाई विनाकारण निकाल्ने लगायतका अत्यन्त अमानवीय कार्यहरू भइरहेको भन्दै गृह मन्त्रालयले आफ्नो ध्यानाकर्षण भएको जनाएको हाे।</p>
<p>विश्वव्यापी महामारीका विरुद्ध लड्नका लागि सबैले सामूहिक प्रयास गर्नुपर्ने बेला एकआपसमा नै निषेधको बाटो अपनाउनु राम्रो नहुने गृह मन्त्रालयले विज्ञप्तिमा उल्लेख छ। </p>
<p>नेपाल सरकारको निर्णयले संक्रामक रोग ऐन, २०२० को दफा २ बमोजिम जारी गरेको यस आदेशको कार्यान्वयन गर्न सबै प्रमुख जिल्ला अधिकारीहरूलाई मुकरर गरेको र जारी आदेशको अवहेलना गर्ने वा काममा बाधा पुर्‍याउने जुनसुकै व्यक्तिलाई पनि सोही कानूनबमोजिम सजाय हुने गृह मन्त्रालयले सबैको ध्यानाकर्षण गराएको छ।</p>
प्रतिक्रिया दिनुहोस्
.jpg)
