सिंहदरबारमा उच्चस्तरीय समितिको बैठक जारी
<p>काठमाडौं। कोभिड-१९ रोकथाम तथा नियन्त्रण उच्चस्तरीय समन्वय समितिको बैठक प्रधानमन्त्री तथा मन्त्रिपरिषद्को कार्यालय सिंहदरबारमा बसिरहेको छ। </p>
<p>बिहान साढे १० बजे शुरु भएको बैठकमा कोभिड-१९ को महामारी र लकडाउनका कारणले विभिन्‍न देशमा अलपत्र परेका नेपाली नागरिकलाई फिर्ता ल्याउने विषयमा छलफल केन्द्रित छ। </p>
<p>यस्तै, स्वदेश फिर्ता आउन चाहने नेपालीलाई पनि कसरी ल्याउने र नेपाल ल्याइसकेपछि के कसरी व्यवस्थापन गर्ने भन्‍ने विषयमा बैठकमा छलफल भइरहेको स्रोतले जानकारी दिएको छ। </p>
<p>विदेशमा अलपत्र परेका नागरिकलाई स्वेदश ल्याउन सरकारलाई दबाब बढिरहेको छ। सर्वोच्च अदालतका आदेश र राष्ट्रिय मानवअधिकार आयोगले पनि पटक-पटक सरकारका नाममा निर्देशन जारी गरिसकेको छ।</p>
<p>प्रतिनिधिसभाको बैठकमा पनि सांसदहरूले विदेशमा अलपत्र परेका नागरिकको उद्धार गर्नुपर्ने आवाज उठाइरहेका छन्। हिजो बसेको मन्त्रिपरिषद्को बैठकमा पनि यस विषयमा छलफल भएको थियो। </p>
<p>प्रधानमन्त्रीले मध्याह्न प्रतिनिधिसभाको बैठकमा नीति तथा कार्यक्रममाथि उठेका प्रश्नहरुको जवाफ दिने कार्यक्रम छ। उच्चस्तरीय समितिले प्रधानमन्त्रीको सम्बोधनअघि नै विदेशमा अलपत्र परेका र स्वदेश फर्किन चाहने नेपालीहरूलाई स्वदेश ल्याउने प्रक्रियाका बारेमा टुंगो लगाउने बुझिएको छ। त्यसैको आधारमा संसद्को बैठकमा प्रधानमन्त्रीले बोल्न सक्ने बुझिएको छ।</p>
प्रतिक्रिया दिनुहोस्
.jpg)
