नेपाल विशेष सेवा विधेयक राष्ट्रिय सभाबाट पारित
<p>काठमाडौं। नेपाल विशेष सेवा विधेयक २०७६ राष्ट्रिय सभाबाट पारित भएको छ।</p>
<p>राष्ट्रिय सभाको आजको बैठकले विधायन व्यवस्थापन समितिको प्रतिवेदनसहित विधेयक पारित गरेको हो।</p>
<p>कानून, न्याय तथा संसदीय मामिलामन्त्री शिवमाया तुम्बाहाम्फेले नेपाल विशेष सेवाको गठन र सञ्चालनसम्बन्धी कानूनलाई संशोधन र एकीकरण गर्न बनेको विधेयकमा समितिको छलफलमा उठेका विषयहरू समावेश गरिएको बताइन्।</p>
<p>मुलुकको सुरक्षा, सार्वभौम सत्ता, भौगोलिक अखण्डता र नेपाली नागरिकको सुरक्षासँग जोडिएको कुराहरू समितिमा छलफल भएकाले त्यसलाई अगाडि बढाउँदै जानुपर्ने उनले बताइन्।</p>
<p>यसअघि विधेयकमाथिको छलफलमा सहभागी हुँदै सांसद प्रमिला कुमारीले समितिमा भएको छलफल विपरीतको विधेयक राष्ट्रिय सभामा पेश भएको भन्दै आपत्ति जनाएकी थिइन्।</p>
<p>समितिको छलफलमा दफा १५ को उपदफा १ मा संविधानविपरीत संशोधन गरिएको भन्दै उनले आपत्ति प्रकट गरेकी थिइन्।</p>
<p>४५ प्रतिशत आरक्षण कोटामा आर्थिक, सामाजिक र राजनीतिक पहुँच नभएका मधेशी, आदिवासी, जनजाति, दलित थारू र मुस्लिमका लागि छुट्याइएको भए पनि त्यसै कोटाबाट १० प्रतिशत खस आर्यका लागि छुट्याइएकोमा उनको आपत्ति थियो।</p>
<p>विपन्न खस आर्यले पनि आरक्षण पाउनुपर्नेमा आफ्नो असहमति नभए पनि ४५ प्रतिशत आरक्षण कोटाबाट नभई ५५ प्रतिशत खुलाबाट चार प्रतिशतसम्म कटौती गरी आरक्षण गर्नु उचित हुने उनले बताइन्।</p>
<p>सांसद कोमल वलीले ऐनमा राष्ट्रिय हित, राष्ट्रिय सुरक्षाका कुराहरू समेटिएको बताइन्। ऐनमा टेलिफोन ट्यापिङ गरिन्छ भन्ने कुरा समेटिएको भन्ने अफवाह फैलाइएको उनको भनाइ छ।</p>
<p>राष्ट्रिय हित विपरीत, देशको सार्वभौमसत्ता, स्वतन्त्रता र संविधानविपरीत काम गर्नेहरूलाई परास्त गर्न ऐनको आवश्यकता परेको उनले बताइन्।</p>
<p>पारित विधेयक अब प्रतिनिधि सभामा जानेछ।</p>
प्रतिक्रिया दिनुहोस्
.jpg)
