राष्ट्रिय सभाले पारित गर्याे खेलकुद विकास विधेयक
<p>काठामाडौं। राष्ट्रिय सभाको आज बसेको बैठकले ‘राष्ट्रिय खेलकुद विकास विधेयक २०७५’ सर्वसम्मतले पारित गरेको छ।</p>
<p>युवा तथा खेलकुदमन्त्री जगतबहादुर सुनार विश्वकर्माले सदनमा ‘राष्ट्रिय खेलकुद विकास विधेयक, २०७५ लाई प्रतिनिधि सभाबाट भएको संशोधन स्वीकारसहित पुनः पारित गरियोस्’ भन्ने प्रस्ताव पेश गरेका थिए।</p>
<p>मन्त्रीको उक्त प्रस्तावलाई राष्ट्रिय सभाले सर्वसम्मतरूपमा पारित गरेको हाे।</p>
<p>यसअघि १६ साउन २०७६ मा राष्ट्रिय सभाले उक्त विधेयक पारित गरी प्रतिनिधि सभामा पठाएको थियो। प्रतिनिधि सभाले गत २१ फागुनमा सर्वसम्मतरूपमा पारित गरी पुनः राष्ट्रिय सभामा पठाएको हो।</p>
<p>राष्ट्रिय सभाबाट पारित यस विधेयकलाई अब राष्ट्रपतिले प्रमाणीकरण गरेपछि कार्यान्वयनमा जान्छ। </p>
<p>नेपाल ओलम्पिक कमिटीका अध्यक्ष जीवनराम श्रेष्ठले भने, ‘‘नयाँ ऐन संघीयताअनुसार बनेको र यसले स्पोर्ट्सको नर्म्स र भ्यालुलाई स्वीकार गरेको छ।’’</p>
<p>केन्द्र र प्रदेशका क्षेत्राधिकार छुट्याइएका छन्। केन्द्रले केन्द्रस्तरमा समन्वय गर्नेछ भने प्रदेशले प्रदेशस्तरमा समन्वय गर्नेछ। जिल्ला प्रदेशअन्तर्गत रहेकाे उनकाे भनाइ छ।</p>
<p>प्रतिनिधि सभाका सदस्यसमेत रहेका श्रेष्ठले भने, ‘‘बोर्डको गठन प्रक्रियामा सम्बन्धित एजेन्सीहरूलाई प्रतिनिधित्व गराउने व्यवस्था गरेको छ। मन्त्रालयसँग प्रत्यक्ष समन्वयको व्यवस्था गरेको छ।’’</p>
प्रतिक्रिया दिनुहोस्
.jpg)
