भारतमा सोमबारदेखि सञ्चालनमा आउँदै आन्तरिक उडान
<p>नयाँदिल्ली। भारतका नागरिक उड्डयन मन्त्री हरदीपसिंह पुरीले २५ मेदेखि आन्तरिक वायु सेवा शुरु हुने घोषणा गरेका छन्।</p>
<p>मन्त्री पुरीले ट्विट गर्दै देशभरका विमानस्थल र एअरलाइन्सहरूलाई त्यसबारे सूचना पठाइसकिएको बताएका छन्।</p>
<p>मन्त्री पुरीका अनुसार शुरुमा थोरै विमानमार्फत सेवा शुरु गरिने छ। त्यसपछि उडान संख्या बढाउँदै लैजाने योजना रहेको उनले बताए।</p>
<p>सरकारले चौथो चरणको लकडाउनको दौरान सार्वजनिक यातायात खोल्दै जाने रणनीति बनाएको थियो। त्यसका लागि भौतिक दूरीको नियम पालना गर्नुपर्ने शर्त छ।</p>
<p>नागरिक उड्डयन मन्त्री पुरीले भने विमानहरूमा निर्धारित भौतिक दूरी कायम राख्‍न नसकिने बताएका छन्। “उडानको दौरान विमानका बीचका सिट खाली राख्‍न सम्भव छैन,” उनले भने, “बीचका सिट खाली राख्‍न हवाई भाडा ३३ प्रतिशतसम्म बढाउनु पर्नेछ।”</p>
<p>भारतमा २४ मार्च मध्यरातिदेखि आन्तरिक उडान बन्द छ। यस्तै, २२ मार्चयता अन्तर्राष्‍ट्रिय उडान पनि भएको छैन।</p>
प्रतिक्रिया दिनुहोस्
.jpg)
