गृहले उपत्यकाका सबै स्थानीय तहलाई परिपत्र गर्दै भन्यो- ‘सबै नाका पूर्ण रूपमा सिल गर’
<p>काठमाडौं। गृह मन्त्रालयले उपत्यकाका सबै स्थानीय तहलाई प्रवेश गर्ने सबै नाका अत्यावश्यक प्रयोजनमा बाहेक पूर्ण रूपमा सिल गर्न परिपत्र गरेको छ।</p>
<p>१ जेठमा गृहमन्त्री रामबहादुर थापाको अध्यक्षतामा स्थानीय तह र सुरक्षा निकायका प्रमुखहरू सहभागी भएको बैठकले गरेका निर्णय कार्यान्वयन गर्न भन्दै गृह मन्त्रालयले सबैलाई परिपत्र जारी गरेको हो।</p>
<p>गृह मन्त्रालयका सह-प्रवक्ता उपसचिव उमाकान्त अधिकारीले १ जेठमा भएको बैठकको निर्णय कार्यान्वयनका लागि उपत्यकाका स्थानीय तहहरूमा निर्देशनसहितको पत्राचार भएको जानकारी दिए। गृहले लुकीछिपी हुने प्रवेश पूर्ण रूपमा रोक्न पनि निर्देशन दिएको छ। </p>
<p>बाहिरबाट प्रवेश नरोकिँदा बढी जनघनत्व भएको काठमाडौं उपत्यका बढी जोखिममा रहेको देखिएकाले अत्यावश्यक काममा बाहेक प्रवेश निषेध गर्न गृहले निर्देशन दिएको हो ।</p>
<p>काठमाडौं उपत्यकाका सबै स्थानीय तहले प्रशसनसँग समन्वय गरी आ-आफ्नो क्षेत्रमा रहेका होटेल, पार्टी प्यालेस, सामुदायिक भवन र अन्य सम्भाव्य स्थलहरूमा क्‍वारेन्टाइन बस्‍ने व्यक्ति स्वयंले त्यसको खर्च भुक्तानी गर्ने गरी सम्भावित क्‍वारेन्टाइन प्रयोजनका लागि लगत संकलन र अन्य व्यवस्थापनको काम अगाडि बढाउन पनि गृहको परिपत्रमा उल्लेख छ। </p>
<p>अत्यावश्यक काममा प्रवेश गर्नुपर्ने कुनै व्यक्तिले त्यसअघि नै स्वयं आफ्नो खर्चमा उपलब्ध भएसम्म आरडीटी परीक्षण गरी त्यसको रिपोर्टका साथ काठमाडौं उपत्यका प्रवेश अनुमतिका लागि माग गर्नुपर्ने भएको छ। </p>
<p>स्थानीय तहले स्थानीय प्रशासनको समन्वयमा लुकिछिपी उपत्यका प्रवेश गर्नेहरुको खोजी, लगत संकलन आवश्यक कारबाहीको प्रक्रिया शुरु गर्न र सबै सुरक्षा निकायलाई उपत्यका प्रवेश नाकाको जाँच र निगरानीमा थप कडाइ गर्ने र स्थानीय तहसँग समन्वय गर्न पनि गृह मन्त्रालयले निर्देशन दिएको छ। </p>
<p>१ जेठको बैठकमा गृहमन्त्री थापा, काठमाडौं महानगरपालिकाका प्रमुख विद्यासुन्दर शाक्य, ललितपुर महानगरपालिका प्रमुख चिरीबाबु महर्जन, गृहसचिव, सुरक्षा निकायका प्रमुखहरू, काठमाडौं उपत्यका नाका भएका नगरपालिकाका प्रमुखहरू तथा काठमाडौं, ललितपुर र भक्तपुरका प्रमुख जिल्ला अधिकारीहरूको सहभागिता थियो।</p>
प्रतिक्रिया दिनुहोस्
.jpg)
