६ महीनाभित्र ७० प्रतिशत कम्पनी बन्द हुने जोखिममा: दुबई चेम्बर अफ कमर्स
<p>दुबई। युनाइटेड अरब इमिरेट्सको राजधानी शहर दुबईको चेम्बर अफ कमर्सले ६ महीनाभित्र ७० प्रतिशत कम्पनी बन्द हुने अवस्थामा पुग्‍ने जोखिम औंल्याएको छ।</p>
<p>कोभिड-१९ को महामारीका कारण उत्पन्‍न जटिल परिस्थिति त्यसका लागि जिम्मेवार भएको दुबई चेम्बर अफ कमर्सको भनाइ छ।</p>
<p>कोभिड-१९ का कारण उत्पन्‍न परिस्थितिबारे चेम्बरले हालै एक सर्वे गरेको थियो, जसको रिपोर्ट हिजो साँझ सार्वजनिक गरेको हो। </p>
<p>सन् २०२० को पहिलो त्रैमासिकमा दुबईका ९० प्रतिशत कम्पनीको बिक्री र कारोबारमा भारी गिरावट देखिएको रिपोर्टमा उल्लेख छ।</p>
<p>महामारीको कारण सिर्जित विश्‍वव्यापी आर्थिक मन्दीको सबैभन्दा ठूलो असर साना र मझौला उद्योगमा परेको सर्वेक्षणमा देखिएको छ।</p>
<p>पर्यटन, रियल स्टेट, होटेल र रेस्टुराँ तथा रिटेल उद्योग सञ्‍चालकहरू सर्वेका क्रममा आफ्नो कारोबारमा ७० प्रतिशत गिरावट आइसकेको बताएका थिए। सन् २०२० को दोस्रो त्रैमासिकमा अझ बढी मन्दी देखिने उनीहरूको भनाइ छ।</p>
<p>सर्वेमा सहभागी ४८ प्रतिशत कम्पनीका सञ्‍चालकले महामारीबाट बच्‍न आफूहरूसँग कुनै योजना नरहेको बताएका छन्। कामदारलाई कम असर परोस् भनेर स-साना योजना भने उनीहरूले बनाएको पाइएको छ।</p>
<p>चेम्बर अफ कमर्सले कम्पनीहरूलाई कानूनी कारवाहीबाट राहत, भाडा छुट, सरकारी खर्चमा कमी र सरकारी शुल्क मिनाहाका लागि सरकारसँग आग्रह गरेको छ।</p>
<p>संयुक्त अरब इमिरेट्समा २७ हजारजना कोरोना भाइरसको संक्रमणमा परेका छन्। पछिल्लो २४ घण्टामा आठ सय ९२ जना संक्रमित थपिएका छन्।</p>
प्रतिक्रिया दिनुहोस्
.jpg)
