निजी क्षेत्रलाई समेटेर राहतका कार्यक्रम ल्याउन माग
<p>काठमाडौं। विराटनगरका उद्योगी/व्यवसायीले निजी क्षेत्रलाई समेट्ने गरी सरकारले राहतका कार्यक्रम नल्याए आन्दोलन गर्ने चेतावनी दिएका छन्।</p>
<p>आज विज्ञप्ति जारी गर्दै नीति तथा कार्यक्रममा निजी क्षेत्रको माग नसमेटे पनि सरकारले बजेटमार्फत् निजी क्षेत्रका लागि राहतका कार्यक्रम ल्याउनु पर्ने बताएका हुन्।</p>
<p>बजेटमा पनि सरकारले निजी क्षेत्रलाई उपेक्षा गरेमा सबै उद्योग व्यवसाय बन्द गरेर सरकारविरुद्ध आन्दोलन गर्ने उनीहरूको भनाइ छ।</p>
<p>देशको अर्थतन्त्रमा उत्कृष्ट योगदान दिँदै आएका उद्योगी/व्यवसायीलाई विश्वव्यापी महामारीको समयमा सरकारले बेवास्ता गरेको उनीहरूको आरोप छ।</p>
<p>विदेशी मुलुकहरूले उद्योग व्यवसाय बचाउन राहतका प्याकेज सार्वजनिक गरिरहेको बताउँदै उनीहरूले बजेटमार्फत् राहतका कार्यक्रम नल्याए सबै उद्योग बन्द गर्ने बताएका छन्।</p>
<p>मोरङ उद्योग संघका अध्यक्ष भीम घिमिरेले निजी क्षेत्रले दिएको सुझावलाई बजेटमा समेट्नु पर्ने बताए।</p>
<p>उनले विदेशी मुलुकले राहतको कार्यक्रम ल्याएर कार्यान्वयन गरिसक्दासमेत नेपाल सरकारले अहिलेसम्म कुनै राहत नदिएको उनकाे भनाइ छ।</p>
प्रतिक्रिया दिनुहोस्
.jpg)
