प्रधानमन्त्री अजरबैजान जानुअघि प्रतिपक्षसँग छलफल
<p>काठमाडौं। प्रधानमन्त्री केपी शर्मा ओली असंलग्न राष्ट्रहरूको १८औं सम्मेलनमा भाग लिन जानु अघि आज प्रतिपक्ष नेपाली कांग्रेसका नेताहरूसँग छलफल गरेका छन्।</p>
<p>अपराह्न बालुवाटारस्थित प्रधानमन्त्री निवासमा सत्तारुढ नेपाल कम्युनिष्ट पार्टी (नेकपा) र प्रमुख प्रतिपक्ष नेपाली कांग्रेसका शीर्ष नेताबीच छलफल भएको हो।</p>
<p>छलफलमा प्रधानमन्त्री एवं नेकपा अध्यक्ष ओलीसँगै नेकपाका अर्का अध्यक्ष पुष्पकमल दाहाल, नेकपाका संसदीय दलका उपनेता सुवासचन्द्र नेम्वाङ र नेपाली कांग्रेसका सभापति शेरबहादुर देउवा, रमेश लेखक तथा मिनेन्द्र रिजाललगायतका नेता सहभागी थिए।</p>
<p>संसदीय दलका उपनेता नेम्वाङले सत्तापक्ष र प्रमुख प्रतिपक्षबीच नियमित भेटघाट शुरू गरिएको <em>देखापढी</em>लाई बताए। संक्रमणकालीन न्यायसम्बन्धमा केही छलफल भएको हो भन्ने प्रश्नमा उनले भने, “सत्तापक्ष र प्रतिपक्षबीचको छलफलमा सबै विषयमा छलफल हुन्छ । संक्रमणकालीन न्यायकाबारे पनि हुन्छ ।”</p>
<p>यसअघ ४ कात्तिकमा पनि प्रधानमन्त्री निवास बालुवाटारमा दुई दलबीच छलफल भएको थियो । उक्त बैठकमा सत्य निरुपण तथा मेलमिलाप आयोग र बेपत्ता छानविन आयोग सम्बन्धी कानून यथाशक्य बनाउनेबारेमा सहमति जुटेको नेम्वाङले <em>देखापढी</em>लाई बताएका थिए।</p>
<p>भोली प्रधानमन्त्री केपी शर्मा ओली असंलग्न राष्ट्रहरूको सम्मेलनमा भाग लिन अजरबैजान जाँदैछन् । प्रधानमन्त्री विदेशमा रहँदा दोस्रो तहका नेताहरूबीच नियमित भेटघाट र छलफल हुने तथा प्रधानमन्त्री फर्किएपछि पुनः शीर्ष नेताहरूबीचको छलफललाई निरन्तरता दिइने उपनेता नेम्वाङले जानकारी दिए । <br />
</p>
प्रतिक्रिया दिनुहोस्
.jpg)
