काठमाडाैं र ललितपुरमा रगतको अभाव
<p>काठमाडाैं। काठमाडौं र ललितपुर जिल्लामा रगतको अभाव देखिएको छ।</p>
<p>नेपाल रेडक्रस सोसाइटीद्वारा सञ्चालित रक्त सञ्चार सेवा केन्द्रले सहजरूपमा रगत उपलब्ध गराउन नसक्दा ती दुई जिल्लामा रगतको अभाव देखिएको हो।</p>
<p>बर्सेनि चाडबाड र चाडबाडपछिको समयमा उपत्यकामा रगतको अभाव देखिने गर्छ। यसलाई सम्बोधन गर्न खासै ध्यान दिएको देखिँदैन।</p>
<p>रक्त सञ्चार सेवा केन्द्रले रगतको अभाव भएकाले रक्तदान गर्न रक्तदातालाई आह्वानसमेत गरेको छ।</p>
<p>कुन समूहको रगत कति अभाव भएको हो भन्नेबारे केन्द्रले जनाएको छैन।</p>
<p>सोसाइटीको सञ्चार विभागद्वारा आज बिहान जारी विज्ञप्तिमा काठमाडौंमा यो हप्तादेखि रगतको अभाव भएकाले रक्तदान गर्न आह्वान गरिएको र सबैको सहयोगले पर्याप्त स्टक भएका कारण दशैंको समयमा रगत अभाव नभए पनि दशैंपछि रक्तदान कार्यक्रम घटेकाले अभाव बढेको जनाइएको छ।</p>
<p>दशैं भर्खरै सकिएको तथा तिहार र छठलगायतका पर्वको समय आइरहेको यस्तो समयमा कलेजसमेत बन्द भएको र रक्तदान कार्यक्रम पनि कम भएकाले अहिले रगतको मागबमोजिम आपूर्तिमा कठिनाइ परेको जनाइएको छ।</p>
<p>रक्तसञ्चार सेवाका निर्देशक पवन गुप्ताले भने, “डेङ्गुलगायत विभिन्न रोगबाट प्रभावित बिरामीका लागि रगतको माग छ, यस्तोमा बिरामीका आफन्तलाई अनुरोध गरेर रक्तदान गर्न भनिरहेका छौं।”</p>
<p>रक्त सञ्चार केन्द्रका अधिकृत राम श्रेष्ठले अहिले सेवा केन्द्रको कालीमाटी कार्यालयमा दैनिक औसतमा ३०० युनिट रगतको माग भई आएको छ तर, आपूर्ति गर्न कठिनाइ भइरहेको छ।</p>
<p>केन्द्रका निर्देशक मनिता राजकर्णिकारले सकेसम्म धेरै संघसंस्थासँग रक्तदानका लागि पहल गरिरहेको जानकारी दिए।</p>
<p>पछिल्लो सयम केन्द्रको रक्त सेवा फितलो र प्रभावहीन बन्दै गएको छ। भनेकाे समयमा चाहिएका रगत समूह सेवाग्राहीले पाउन धौधौ पर्ने गर्दछ।</p>
<p>ललितपुरको रक्तसञ्चार केन्द्रमा पनि रगतको अभाव भइरहेको शाखाका सभापति बाबुराजा महर्जनले जानकारी दिए। <em>रासस</em></p>
प्रतिक्रिया दिनुहोस्
.jpg)
