बहुवर्षे योजनालाई निरन्तरता दिन बजेट अपुगः मन्त्री बस्नेत
<p>पोखरा। गण्डकी प्रदेशका भौतिक पूर्वाधार विकासमन्त्री रामशरण बस्‍नेतले आगामी आर्थिक वर्षमा बहुवर्षे योजनालाई निरन्तरता दिन बजेट अपुग हुने बताएका छन्।</p>
<p>संसद्को अर्थ तथा विकास समितिद्वारा शुक्रबार आयोजित छलफल कार्यक्रममा प्रदेशसभा सदस्यले उठाएका जिज्ञासाको जवाफ दिँदै मन्त्री बस्‍नेतले आगामी आर्थिक वर्षका लागि बजेट सीमा जम्मा रु. चार अर्बको प्राप्त भएको र सो बजेट अपुग हुने बताए।</p>
<p>चालू आवमा मन्त्रालयको पूँजीगत बजेट रु. १२ अर्ब ९१ करोड रहेकामा आगामी आवका जम्मा रु. चार अर्बको सिलिङ प्राप्त भएको उनले उल्लेख गरे।</p>
<p>प्रदेश सरकारले यसअघि नीति तथा कार्यक्रममा समावेश प्रदेशभित्र एक घर एक धारा, प्रदेशको राजधानीबाट प्रत्येक स्थानीय तहको केन्द्रसम्म पुग्ने कालोपत्रे सडक, उज्यालो प्रदेशलगायत महत्त्वपूर्ण कार्यक्रमसमेत प्रभावित हुने उनको भनाइ छ।</p>
<p>मन्त्री बस्‍नेतले वैशाखसम्म मन्त्रालयको ३९ प्रतिशत वित्तीय प्रगति रहेको जानकारी दिए। त्यसमध्ये एक निर्वाचन क्षेत्र एक नमूना सडकको वित्तीय प्रगति ८६.७९ प्रतिशत रहेको उनले बताए। <em><strong>रासस</strong></em></p>
प्रतिक्रिया दिनुहोस्
.jpg)
