लकडाउन खुकुलो बनाउँदै भारतमा आजदेखि आन्तरिक उडान शुरु
<p>नयाँदिल्ली। भारत सरकारले लकडाउनका प्रतिबन्धहरूमा केही खुकुलो गर्दै आजदेखि आन्तरिक उडानहरू सञ्‍चालनमा ल्याएको छ।</p>
<p>सामाजिक सञ्‍जालहरूमा भने कोरोना भाइरसको संक्रमण बढिरहेका बेला उक्त सरकारी निर्णयको समीक्षा हुनुपर्ने माग आइरहेको छ।</p>
<p>पछिल्लो २४ घण्टामा ६ हजार सात सयभन्दा बढी नयाँ संक्रमित थपिएका छन्। यससँगै भारतभर कुल संक्रमित संखया एक लाख ३१ हजार नाघेको छ।</p>
<p>एअरलाइन्सहरूले एक तिहाइ उडान शुरु गरिएको बताएका छन्। जहाजका यात्रीहरूको क्‍वारेन्टाइनसम्बन्धी नियम स्पष्‍ट नहुँदै उडान शुरु गरिएको छ।</p>
<p>भारतका व्यस्त र व्यापारिक हवाई अड्डा मानिने महाराष्‍ट्र, तमिलनाडु र पश्‍चिम बंगालका विमानस्थलहरूले उडान सञ्‍चालन गर्ने तयारी पूरा नभएको बताएका छन्।</p>
<p>केन्द्रीय उड्डयन मन्त्री हरदीपसिंह पुरीले आजदेखि आन्तरिक उडान सञ्‍चालन हुन थालेकामा ट्विटरमार्फत खुशी व्यक्त गरेका छन्।</p>
<p>तर, पश्‍चिम बंगाल सरकारले आन्तरिक उडान थाल्न केही समय दिन केन्द्र सरकारसँग आग्रह गरेको छ। पश्‍चिम बंगाल अहिले बंगालको खाडीबाट शुरु भएको अम्फन तुफानका कारण अस्तव्यस्त अवस्थामा छ।</p>
<p>केन्द्रीय मन्त्री पुरीले भने आगामी बिहीबारदेखि कोलकाताबाट पनि उडान शुरु हुने बताएका छन्।</p>
प्रतिक्रिया दिनुहोस्
.jpg)
