सुदूरपश्चिम प्रदेशसभाको वर्षे अधिवेशन आजदेखि
<p>कैलाली । सुदूरपश्‍चिम प्रदेशसभाको छैटौं वर्षे अधिवेशन आजदेखि शुरु हुँदैछ। कोराना भाइरसको जोखिम न्यूनीकरणका लागि भौतिक दूरी र स्वास्थ्य सुरक्षाका उपाय अवलम्बन गर्दै दिउँसो २ बजेदेखि अधिवेशन शुरु हुन लागेको हो ।</p>
<p>कोरोना भाइरसको संक्रमणबाट जोगिन सभाकक्षमा साविकमा राखिएका टेबुल, कुर्सीलाई दूरी कायम हुने गरी व्यवस्थापन गरिएको प्रदेशसभा सचिवालयका सचिव रामसिंह धामीले बताए।</p>
<p>भौतिक दूरीमा बस्‍नु पर्ने अहिलेको अवस्थामा अन्य उपयुक्त स्थान नभेटिएकाले बैठक कक्ष केही साँघुरो भएको उनले बताए । उनका अनुसार सभाकक्षमा कम्तिमा एक मिटर दूरी कायम गरेर प्रदेशसभा सदस्यका लागि कुर्सी र टेबल व्यवस्थापन गरिएको छ ।</p>
<p>सभाकक्षमा प्रवेश गर्दा स्यानिटाइजर, मास्क, पञ्‍जालगायत सामग्रीको प्रयोग अनिवार्य गरिएको छ ।</p>
<p>प्रदेश सरकारको सिफारिसमा प्रदेश प्रमुख शर्मिलाकुमारी पन्तले उक्त अधिवेशन आह्वान गरेकी हुन् । पहिलो दिन सभामुख अर्जुनबहादुर थापाले प्रदेश प्रमुखको कार्यालयवाट अधिवेशन आह्वानसम्बन्धी प्राप्त पत्रको व्यहोरा सदनलाई जानकारी दिनेछन् ।</p>
<p>यस्तै, प्रदेशसभामा प्रतिनिधित्व गर्ने नेपाल कम्युनिस्ट पार्टी (नेकपा), नेपाली कांग्रेस र साविकको राष्‍ट्रिय जनता पार्टी (हाल राष्‍ट्रिय समाजवादी पार्टी) का एक–एक जना नेताले बोल्ने तय भएको छ ।</p>
<p>बजेट अधिवेशन भएकाले पहिलो दिनको बैठकमा आर्थिक मामिला तथा योजनामन्त्री झपटबहादुर बोहराले प्रि-बजेट पेश गर्ने कार्यसूची पनि छ ।</p>
<p>सुदूरपश्‍चिम प्रदेशसभामा तीनवटा राजनैतिक दलका ५३ जना सदस्य छन्। </p>
<p>अधिवेशनको तयारीका क्रममा प्रदेश सरकारका मन्त्री, प्रदेशसभाका सदस्यहरू, मर्यादापालक, सुरक्षाकर्मी, सचिवालयका कर्मचारी र सञ्‍चारकर्मीलगायत दुई सय ९४ जनाको स्वाबको नमूना संकलन गरी परीक्षण गरिसकिएको छ। सबैको रिपोर्ट नेगेटिभ आएको छ ।</p>
प्रतिक्रिया दिनुहोस्
.jpg)
