प्रदेश १ सभाको बैठक दुई वटा तलाबाट सञ्चालन गरिने
<p>विराटनगर। भोलि, १४ जेठदेखि शुरू हुने प्रदेश १ को बजेट अधिवेशनमा सभाहल साँघुरो भएपछि प्रदेश सभाले दुई वटा तलामा बैठक सञ्‍चालनको तयारी गरेको छ।</p>
<p>सामाजिक दूरी कायम गर्दै पहिलेको सभाहलमा बैठक संचालन गर्न असम्भव भएकोले भुँई तला र पहिलो तलामा रहेको दुवै सभाहलहरुलाई प्रयोग गरेर बैठक चलाउने तयारी गरिएको प्रदेश सचिवालयले जनाएको छ।</p>
<p>सभाहलभित्र अब ६५ वटा मात्र कुर्सी राखिएको छ। माथिल्लो तलामा ३० वटा कुर्सीको व्यवस्था गरिएको छ।</p>
<p>सभाहलको पुरानो संरचनामा प्रदेशसभा सदस्यहरूका लागि ९३ वटासहित दर्शकदीर्घा र पत्रकारका लागिसमेत गरी १२० वटा कुर्सीहरू थिए।</p>
<p>माथिल्लो हलमा बस्ने सांसदहरुले टेलिभिजन सेटमार्फत भुँईतलाको गतिविधि अवलोकन गर्ने र माथिल्लो हलको गतिविधि भुँईतलामा रहेको टेलिभिजन सेटबाट अवलोकन गरिनेछ। सभामुखले कम्प्युटरको मोनिटरबाट माथिल्लो सभाहलको गतिविधि अवलोकन गर्ने व्यवस्था मिलाइएको छ।</p>
<p>पत्रकारका लागि नेपाली कांग्रेस संसदीय दलको कार्यकक्षमा मिडिया सेन्टर स्थापना गरी टेलिभिजन सेटमार्फत समाचार संकलनको प्रबन्ध गरिएको छ।</p>
प्रतिक्रिया दिनुहोस्
.jpg)
