संविधान संशोधन विधेयक प्रतिनिधि सभामा पेश हुने
<p>काठमाडौं। प्रतिनिधि सभाको आजको बैठकमा सरकारले संविधान संशोधन विधेयक पेश गर्ने भएको छ।</p>
<p>दिउँसो २ बजे बोलाइएको बैठकमा 'नेपालको संविधान (दोस्रो संशोधन) विधेयक, २०७७' प्रस्तुत गर्न लागिएको संसद सचिवालयले सार्वजनिक गरेको सम्भावित कार्यसूचीमा जनाइएको छ।</p>
<p>बैठकमा कानून, न्याय तथा संसदीय मामिलामन्त्री डा. शिवमाया तुम्बाहाङ्फेले संविधान संशोधन विधेयकलाई प्रस्तुत गर्न अनुमति माग्नेछिन्।</p>
<p>सभाको अनुमति पाएपछि कानूनमन्त्रीले ‘नेपालको संविधान (दोस्रो संशोधन) विधेयक, २०७७’ पेश गर्नेछिन्।</p>
<p>भारतद्वारा अतिक्रमित भूभाग लिम्पियाधुरा, कालापानी र लिपुलेकसमेत समेटेर सरकारले ७ जेठमा जारी गरेको नेपालको पूर्ण नक्शालाई निशान छापमा समेत अद्यावधिक गर्नका लागि संविधान संशोधन गर्न लागिएको हो।</p>
<p>संविधानको अनुसूची ३ मा नेपालको निशान छाप कस्तो हुने भन्ने व्यवस्था छ। निशान छापको बीचमा नेपालको नक्शा छ।</p>
प्रतिक्रिया दिनुहोस्
.jpg)
