एन्फा अध्यक्ष शेर्पालाई कारबाही गर्न संसदमा माग
<p>काठमाडौं। समाजमा विभेदको बीजारोपण गरेको भन्दै अखिल नेपाल फुटबल संघ (एन्फा)का अध्यक्ष कर्माछिरिङ शेर्पामाथि कारबाही गर्न प्रतिनिधि सभा बैठकमा माग गरिएको छ।</p>
<p>आज बसेको प्रतिनिधि सभा बैठकको शून्य समयमा बोल्दै सांसद बिमलप्रसाद श्रीवास्तवले एन्फा अध्यक्ष शेर्पामाथि छानबिन गरी कारबाहीकाे माग गरेका हुन्।</p>
<p>‘‘नेपाल फुटबल संघका अध्यक्ष कर्माछिरिङ शेर्पाले नेपाली समाजमा विभेदको बीजारोपण गरेको बुझिएको छ’’, संसदको शून्य समयमा बोल्दै सांसद श्रीवास्तवले भने, ‘‘उहाँले मधेसीहरूलाई सेनाको माध्यम लगाएर राष्ट्रिय गान सिकाउँदै छु भन्ने अभिव्यक्ति दिनु भएकाले त्यस्ता व्यक्तिलाई आवश्यक छानबिन गरी कारबाही गर्न माग गर्दछु।’’</p>
<p>एन्फा अध्यक्ष शेर्पाले अमेरिकाबाट सञ्चालन भइरहेको दुर्विन नेपालसँगको अन्तर्वार्तामा तराईका मानिसमा राष्ट्रियताको भावना कमी भएको र राष्ट्रियता सिकाउन तराईका चार जिल्लामा ग्रासरूटको कार्यक्रम शुरू गरेको बताएका थिए।</p>
<p>‘‘हामीले नेपाल आर्मीसँगको सहकार्यमा तराईका चार जिल्ला सप्तरी, सिरहा, धनुषा र महोत्तरीमा ग्रासरूट फुटबल कार्यक्रम शुरू गरेका छौं। त्यहाँ किन शुरू गर्‍यौं भन्दा- दुईवटा कारण छन्। एउटा, तराईको बच्चाहरूलाई फुटबलप्रति आकर्षण गर्नका लागि, अर्को कुरा राष्ट्रियता सिकाउनका लागि। किनभने तराईतिर जाँदा राष्ट्रियताको फिलिङ अलि कम छ’’, शेर्पाले अन्तर्वार्तामा भनेका छन्, ‘‘आर्मीको ब्यारेक आउँदा कम्तीमा राष्ट्रिय गीत गाउने, नेपालको विषयमा चर्चा हुने र फुटबलको माध्यमबाट खेलाडी उत्पादन गर्ने हिसाबले पनि हामीले काम गरेका हौं। त्यसैले ग्रासरूट कार्यक्रम सफलताको शिखरमा पुगेको छ।’’</p>
<p>एन्फा विधानको धारा ३ को उपधारा १ मा ‘एन्फा सबै किसिमका राजनीतिक तथा धार्मिक विषयवस्तुमा तटस्थ रहनेछ’ भनी उल्लेख छ। त्यस्तै उपाधारा दुईमा ‘कुनै व्यक्ति, देश, समूह वा जात, रंगभेद, जाति, राष्ट्रियता वा सामाजिक उत्पत्ति, लिङ्ग, अशक्तता, भाषा, धर्म, राजनीतिक वा अन्य कुनै विचार, धन, जन्म वा अन्य कुनै प्रकारको मर्यादा, यौनिक अभिमुखीकरण अथवा अन्य कुनै कारणहरूको आधारमा कुनै पनि प्रकारको भेदभावलाई निषेध गरिएको छ र यस्तो कार्य दण्डनीय छ। यस्ता भेदभावका कार्य गरेमा निलम्बन, निस्कासन वा अनुशासनात्मक कारबाही गरिने छ’ भनी उल्लेख छ।</p>
<p>अध्यक्ष शेर्पाले विधानविपरीत समाजिक भावनामा खलल पुर्‍याउने अभिव्यक्ति दिएको भन्दै एन्फाभित्र असन्तुष्टि बढ्दै गएको थियो।</p>
प्रतिक्रिया दिनुहोस्
.jpg)
