विश्व महिला सम्मेलनकाे काठमाडौं घोषणापत्र जारी
<p>काठमाडाैं। ‘युग समानता २०३० सम्ममा प्राप्तिका लागि महिलावादी आन्दोलनलाई गतिवर्द्धन गरौं’ भन्ने अभियानका साथ शुरु भएको पाँचाैं विश्व महिला सम्मेलन काठमाडौंमा सम्पन्न भएको छ।</p>
<p>सम्मेलनमा सात प्रदेशका महिलाको सहभागिता थियो। </p>
<p>बियोण्ड बेजिङ कमिटीले २० बुँदे काठमाडौं घोषणापत्र पारित गर्दै सो सम्मेलन समापन गरेको हो।</p>
<p>घोषणापत्रमा महिलामाथि गरिने सबै प्रकारका विभेद्को अन्त्य, राष्ट्रिय महिला आयोगलाई पूर्णता, समानुपातिक सहभागितालाई कार्यान्वयन, बालविवाहको अन्त्य लगायतका विषय समेटिएका छन्।</p>
<p>कार्यक्रममा महिला बालबालिका तथा ज्येष्ठ नागरिकमन्त्री थममाया थापा मगरले महिला हिंसा अन्त्य गर्न तीनै तहका सरकारले जिम्मेवार भई काम गर्नुपर्ने बताए।</p>
<p>उनले स्थानीय सरकारसँग बुझेर महिला हिंसा निवारण कोष निर्माण गर्ने तयारीमा सरकार जुटेको उल्लेख गरे। </p>
<p>बियोण्ड बेजिङ कमिटी नेपालका अध्यक्ष शान्तालक्ष्मी श्रेष्ठले सन् १९९५ मा चीनको बेजिङमा सम्पन्न चाैंथाे विश्व महिला सम्मेलनका कारण महिलाले आफ्नो आवाज राख्न वातावरण बनेको बताए।</p>
<p>उनले चाैंथो विश्व महिला सम्मेलनले विश्वलाई नै लैङ्गिक समानताको लागि उन्मुख गराएका कारण नेपालमा पनि परिवर्तन आएको दाबी गरे।</p>
<p>नेपालले बेजिङ सम्मेलनले प्रतिपादन गरेका १२ मुद्दा कार्यान्वयनका लागि राष्ट्रिय कार्यनीति तयार गरी पूर्ण प्रतिबद्धता व्यक्त गरिसकेको छ, जसमा बियोण्ड बेजिङ कमिटी नेपालले सन् १९९४ देखि नै लैङ्गिकता र महिला तथा बालिकाको अधिकारका लागि काम गर्दै आएको छ। <em>रासस</em></p>
प्रतिक्रिया दिनुहोस्
.jpg)
