शिक्षामा १ खर्ब ७१ अर्ब बजेट
<p>काठमाडौं। अर्थमन्त्री डा. युवराज खतिवडाले शिक्षा, विज्ञान तथा प्रविधि मन्त्रालयलाई गत वर्षभन्दा ८ अर्ब ७१ करोड बढी बजेट विनियोजन गरेका छन्।</p>
<p>अर्थमन्त्री खतिवडाले शिक्षा मन्त्रालयलाई १ खर्ब ७१ अर्ब ७१ करोड बजेट विनियोजन गरेका छन्। </p>
<p>कोभिड-१९ महामारीका बेला शिक्षा उच्च प्राथमिकतामा राख्दै सरकारले विभिन्न कार्यक्रमका लागि बजेट विनियोजन गरेको हो।</p>
<p>आगामी वर्ष आधारभूत शिक्षामा सबैको पहुँच स्थापित गरिने अर्थमन्त्री खतिवताले बजेटभाषणमार्फत बताए। </p>
<p>मातृभाषाको शिक्षालाई मुलधारमा ल्याउनेछ। त्यस्तै आगामी वर्ष साक्षर नेपाल घोषणा गर्ने सरकारको योजना रहेको अर्थमन्त्री खतिवडाले जानकारी दिए।</p>
<p>निःशुल्क पाठ्यपुस्तक उपलब्ध गराउन २ अर्ब ७६ करोड बजेट विनियोजित गरिएको छ।</p>
<p>त्यस्तै विश्व विद्यालय अनुदान अयोगमार्फत दिइने अनुदानका लागि १७ अर्ब ४३ करोड विनियोजित गरिएको छ।</p>
<p>त्यस्तै राष्ट्रपति शैक्षिक सूधार कार्यक्रम विस्तार गर्नका लागि ६ अर्ब रुपैयाँ बजेट विनियोजित गरिएको छ।</p>
<p>कोरोना महामारीका कारण विद्यालय सञ्चालनमा समस्या भइरहेका बेला सरकारले भर्चुअल कक्षा सञ्चालनमा जोडमा जोड दिएको छ।</p>
<p>भर्चुअल, अनलाइन, रेडियो, टेलिभिजनमार्फत सिकाइ गर्नेगरी विद्यालयहरु सञ्चालन गरिनेछ। लकडाउनमा बन्द रहेका शिक्षणसंस्था दूर शिक्षा लगायतको विकल्पका आधारमा शुरू गरिने भएको हो। </p>
<p>एक हजार ८०० विद्यालय स्थापन गर्नका लागि आवश्यक पर्ने बजेटको व्यवस्था गरिएको छ।</p>
<p>माध्यमिक तहसम्मको शिक्षालाई निःशुल्क गर्ने सरकारको योजना रहेको छ। त्यस्तै माध्यमिक तहका निजी स्कुलले एक सामुदायिक स्कुलको जिम्मेवारी लिनुपर्ने भएको छ।</p>
<p>६ हजार स्वयंमसेवक परिचालनका लागि २ अर्ब २३ करोड बजेट विनियोजन गरिएको छ।</p>
<p>मदन भण्डारी विज्ञान तथा प्रविधि विश्वविद्यालयको पूर्वाधार निर्माण र शैक्षिक कार्यक्रम शुरू गर्न एक अर्ब २५ करोड बजेट विनियोजित गरिएको छ।<br />
<br />
दृष्टिविहीन विद्यार्थीलाई निःशुल्क सेतो छडी र ब्रेललिपिका पाठ्यपुस्तक उपलब्ध गराउने भएको छ।</p>
<p>शिक्षाको गुणस्तर सुधारलाई बजेटमा प्राथमिकतामा राखेको जनाउँदै अर्थमन्त्री खतिवडाले दृष्टिवीहिन बालबालिकाको शिक्षालाई सहज बनाउन सेतो छडी र ब्रेललिपीका पाठ्यपुस्तक निशुल्क उपलब्ध गराइने जानकारी दिए।</p>
<p>यस्तै, शैक्षिक बेरोजगारलाई सहकारी मार्फत् कर्जा उपलब्ध गराएर आत्मनिर्भर गराइने सरकारको योजना छ। </p>
<p>यस्तै, पर्यटन विश्वविद्यालयको स्थापनाका लागि संभाव्यता अध्ययन र माध्यमिक तह भन्दामाथि पर्यटन सम्बन्धी पाठ्यक्रम तयार पारिनेछ। </p>
<p>आगामी वर्ष ७५ हजार युवालाई सीपयुक्त तालिम प्रदान गगरिनेछ। प्राविधिक शिक्षा तथा व्यवसायिक तालिम केन्द्र (सिटिइभिटि) मार्फत् ७५ हजार व्यक्तिलाई सीपयुक्त तालिम प्रदान गर्न ४ अर्ब ३४ करोड विनियोजन गरिएको छ।</p>
<p>यस कार्यक्रमबाट बजारमा प्रवेश गर्ने नयाँ श्रमिक, कोरोनाका कारण रोजगारी गुमाएका असंगठित क्षेत्रका श्रमिक र वैदेशिक रोजगारीबाट फर्किएका व्यक्तिहरुले रोजगारी प्राप्त गर्ने सरकारले लक्ष्य लिएको छ।</p>
<p>कृषि पढेका तथा अन्य व्यवसायिक शिक्षा लिएका विद्यार्थीलाई पढाइसँगै आयआर्जनको व्यवस्था मिलाइन अर्थमन्त्री खतिवडाले जानकारी दिए।</p>
<p>आर्थिक वर्ष २०७६/७७ मा शिक्षा क्षेत्रका लागि कुल बजेटको १०.६३ प्रतिशत बजेट बिनियोजन गरिएको थियो। शिक्षा क्षेत्रका लागि १ खर्ब ६३ अर्ब बजेट छुट्याइएको थियो।</p>
प्रतिक्रिया दिनुहोस्
.jpg)
