बालिका हत्या आरोपमा बाङ्लादेशमा १६ जनालाई मृत्युदण्ड
<p>काठमाडौं। शिक्षकलाई यौन दुर्व्यवहारको आरोप लगाउने एक विद्यार्थीको हत्या गरेको आरोपमा बाङ्लादेशको अदालतले १६ जनालाई मृत्युदण्डको सजायँ सुनाएको छ।</p>
<p>बाङ्लादेशको राजधानी ढाकाबाट करीब १६० किलोमिटर टाढा रहेको फेनी नगरकी १९ वर्षीया नूसरत जँहा रफीको गत अप्रिल महिनामा आगो लगाएर हत्या गरिएको थियो।</p>
<p>नुसरतले आफूविरुद्द यौन दुर्व्यवहारको आरोप लगाएका स्कूलका प्रधानाध्यापकबाहेक उनका दुई सहपाठी छात्रालाई पनि दोषि ठहर गरिएको छ।</p>
<p>उनको हत्यालाई लिएर पुरै बाङ्लादेश स्तब्ध भएको थियो।</p>
<p>हत्याकोे विरोध र उनको परिवारलाई न्यायको माग गर्दै बाङ्लादेशमा लगातार प्रदर्शन भई रहेका थिए।</p>
<p>बाङ्लादेशको अदालतले यो मुद्दाको फौसला अन्य मुद्दाको तुलनामा छिटो गरेको बीबीसीले जनाएको छ।</p>
<p>अभियोजनकर्ता हाफेज अहमदले भने,‘यो निर्णयले बाङ्लादेशमा कुनै पनि हत्याराले उन्मुक्ति नपाउने कानून रहेको प्रष्ट भएको छ।’</p>
<p>यद्यपि विपक्षीको पक्षबाट अदालतमा मुद्दा लड्दै आएका वकीलले अदालतको निर्णयविरुद्द अपिल गर्ने बताएका छन्।</p>
<p>नुसरतको हत्याको अनुसन्धान गर्दा उनले यौन दुर्व्यवहारको विषयमा कतै बोल्न नसक्ने षड्यन्त्र गरिएको पाइएको छ।</p>
<p>उनलाई बोल्न नदिनेमा उनकै कक्षाका सहपाठीदेखि समाजका गन्यमान्य व्यक्तिहरु रहेको बताइएको छ।</p>
<p>अनुसन्धानको क्रममा नुसरतका विषयमा गलत हल्ला फैलाएर उनको हत्यालाई आत्महत्या करार गर्न स्थानीय प्रहरी पनि संलग्न रहेको बीबीसीले जनाएको छ। </p>
प्रतिक्रिया दिनुहोस्
.jpg)
