महराकाे तिहार पनि हिरासतमै, अनुसन्धान गर्न प्रहरीलाई थप ७ दिन
<p>काठमाडाैं। संसद सचिवालयमा कार्यरत् एक महिलामाथि बलात्कार प्रयासको आरोपमा पक्राउ परेका पूर्वसभामुख कृष्णबहादुर महरालाई थप सात दिन हिरासतमा राखेर अनुसन्धान गर्न म्याद दिएको छ।</p>
<p>म्याद थपका लागि आज तेस्रो पटक अदालतमा पुर्‍याइएका महरालाई काठमाडौं जिल्ला अदालतका न्यायाधीश सुदर्शनराज पाण्डेको इजलासले हिरासतमा राखेर अनुसन्धान गर्न अनुमति दिएको हो।</p>
<p>दिउँसो साढे ३ मा अदालत पुर्‍याइएका महराका तर्फबाट बहस गरेका वकीलहरूले जमानतमा रिहा गर्नुपर्ने माग गरेका थिए।</p>
<p>जिल्ला सरकारी वकीलले भने महराको डीएनएन परीक्षणको रिपोर्ट, उनको कल डिटेललगायतको अनुसन्धान अझै बाँकी रहेकाले सात दिन थप हिरासतमा राखेर अनुसन्धान गर्न म्याद कायम हुनुपर्ने बताएका थिए।</p>
<p>जिल्ला सरकारी वकीलको कार्यालय काठमाडौंमा करीब दुई घण्टा राखेपछि महरालाई काठमाडौं जिल्ला अदालत पुर्‍याइएको थियो।</p>
<p>अदालतले यसअघि दुईपटक थपेको म्याद सकिएको छ।</p>
<p>१९ असोज बेलुका बालुवाटारस्थित सभामुख निवासबाट पक्राउ परेका महरा १८ दिनदेखि हिरासतमा छन्।</p>
<p>२३ असोजदेखि स्वास्थ्यमा समस्या आएपछि उनको थापाथलीस्थित नर्भिक अस्पतालमा उपचार भइरहेको छ।</p>
<p>उनलाई हिरासतमा राखेर अनुसन्धान गर्न दोस्रो पटक थप भएको ५ दिनको म्याद हिजो सकिएको थियो।</p>
<p>प्रहरीले २५ दिनसम्म हिरासतमा राखेर अनुसन्धान गर्न सक्ने कानूनी प्रावधान रहेको छ।</p>
<p>बलात्कार प्रयासको आरोप लागेपछि महराले १४ असोजमा सभामुख पदबाट राजीनामा दिएका थिए। तर, उनले सांसद पदबाट भने अहिलेसम्म राजीनामा दिइसकेका छैनन्।<br />
सात दिनको म्याद थपसँगै महरा अब १३ कात्तिकसम्म प्रहरी हिरासतमा नै रहनेछन्।</p>
<p>प्रहरीले अब १४ कात्तिकमा अनुसन्धान प्रतिवेदन सरकारी वकील कार्यालयमा पेश गरिसक्नु पर्नेछ।</p>
<p>त्यसपछि सरकारी वकील कार्यालयले अदालतमा मुद्दाको अभियोग पत्र दायर गर्नुपर्ने हुन्छ।</p>
प्रतिक्रिया दिनुहोस्
.jpg)
