सगरमाथाको उचाइ नेपाल र चीनले संयुक्त रूपमा सार्वजनिक गर्छः चिनियाँ राजदूत
<p>काठमाडौं। नेपालका लागि चिनियाँ राजदूत होउ यान्छीले सगरमाथाको उचाइ नेपाल र चीनले संयुक्त रूपमा सार्वजनिक गर्ने बताएकी छन्।</p>
<p>राजदूत यान्छिले ट्वीट गर्दै चिनियाँ सर्वेयरले पनि सगरमाथाको चुचुरोमा पुगेर सगरमाथाको नाप लिएको बताएकी छिन्।</p>
<p>उनले ट्वीटरमा फोटो पोस्ट गरेर २६ मे २०२० मा चिनियाँ सर्वेयर टोली सगरमाथाको चुचुरोमा पुगेको बताइन्।</p>
<p>“सफलतापूर्वक सगरमाथाको चुचुरोमा पुगेका चिनियाँ र नेपाली टीमलाई बधाई। सगरमाथा दुवै देशको मित्रताको संकेत हो। दुवै देशले संयुक्त रूपमा सगरमाथाको उचाइ संयुक्त वक्तव्य मार्फत सार्वजनिक गर्नेछ”, यान्छीले भनेकी छिन्। </p>
<p>नेपालले गत वर्ष नै सगरमाथाको नाप लिइसकेको छ। चिनियाँ राजदूतले चिनियाँ र नेपाली टोली भनेर २२ मे २०१९ मा नेपाली टोलीले खिचेको फोटो राखेकी छिन्।</p>
<p>नापी विभागबाट गएको सर्वेयर टोलीले २२ मे २०१९ मा सगरमाथाको नाप लिएको नापी विभागका सूचना अधिकारी दामोदर ढकालले बताए।</p>
<p>“हामीले सगरमाथामा विभिन्न ठाउँबाट विभिन्न प्रविधिमा लिएको नापको तथ्यांक प्रशोधनको काम अन्तिम चरणमा छ। लकडाउनको कारण काम प्रभावित भएको छ”, ढकालले भने।</p>
<p>तर, नेपाल र चीनले संयुक्त रूपमा सगरमाथाको उचाइ सार्वजनिक गर्ने बारेमा भने थाहा नभएको उनले बताए।</p>
प्रतिक्रिया दिनुहोस्
.jpg)
