पूर्वाधार विकास कर हटेपछि घट्याे हवाई इन्धनको मूल्य
<p>काठमाडौं। नेपाल आयल निगमले आन्तरिक र अन्तर्राष्ट्रिय हवाई इन्धनको मूल्य घटाएको छ।</p>
<p>सरकारले बजेटमार्फत् हवाई इन्धनमा लगाउँदै आएको पूर्वाधार विकास कर हटाएपछि निगमले आन्तरिक र अन्तर्राष्ट्रिय हवाई इन्धनको मूल्य घटाएको हो।</p>
<p>१५ जेठमा बजेट भाषण गर्ने क्रममा अर्थमन्त्री डा. युवराज खतिवडाले हवाई इन्धनमा लाग्दै आएको १० रूपैयाँ पूर्वाधार विकास कर हटाएको घोषणा गरेका थिए।</p>
<p>निगमले आन्तरिक हवाई इन्धनको मूल्य प्रतिलिटर १० रूपैयाँ र अन्तर्राष्ट्रियतर्फ प्रतिकिलोलिटर ८२ अमेरिकी डलरले मूल्य घटाएको छ।</p>
<p>निगमका कार्यकारी निर्देशक सुरेन्द्रकुमार पौडेलले १५ जेठ रातिदेखि नै लागू हुने गरी हवाई उडानको मूल्य घटाएको <em>देखापढी</em>लाई बताए।</p>
<p>१० रूपैयाँले घटेपछि आन्तरिक हवाई इन्धनको मूल्य प्रतिलिटर ६५ रूपैयाँ कायम भएको छ।</p>
<p>यस्तै, ८२ डलरले घटेपछि अन्तर्राष्ट्रिय हवाई इन्धनको मूल्य प्रतिकिलोलिटर ८६८ अमेरिकी डलर कायम भएको छ।</p>
<p>यसअघि, आन्तरिक हवाई इन्धनको मूल्य प्रतिलिटर ७५ रूपैयाँ थियो भने अन्तर्राष्ट्रिय इन्धनको मूल्य प्रतिकिलाेलिटर ९५० अमेरिकी डलर थियो।</p>
प्रतिक्रिया दिनुहोस्
.jpg)
