Others

गृहपृष्ठ

‘सरकारले संकटलाई अवसरमा बदल्ने मौका गुमायो’ काठमाडौं। नेपाली कांग्रेसका सांसद मिनेन्द्र रिजालले सरकारले संकटलाई अवसरमा बदल्ने मौका गुमाएको बताएका छन्।  आगामी आर्थिक वर्षको बजेट राजश्व र व्ययको अनुमानमाथिको छलफलमा रिजालले मुलुकलाई संकटबाट जोगाएर आर्थिक विकास लागि प्राप्त अवसर गुमाएको टिप्पणी गरे। ‘‘यसपालि मुलुकलाई संकट छ। दुनियाँ शताब्दीको गहिरो संकट भोग्दै छ। यो संकटलाई अवसरमा बदल्ने कल्पनाशिलता बजेटमा अपेक्षा गरिएको थियो। बलशाली सरकारले त्यो कल्पनाशिलता देखाएन”, रिजालले भने।  बजेटमा काम गर्छु भनेर ८३ पेजको दस्तावेजमा उल्लेख भएका काम गर्नका लागि पैसा कहाँबाट आउँछ भनेर उनले प्रश्न गरे। कोरोना नियन्त्रण तथा रोकथामका लागि स्थानीय तहबाहेक अरुले काम नै गर्न नसक्ने अवस्थामा पनि बजेट नदिइएको उनले बताए। स्थानीय तहलाई शसर्त अनुदान बाहेक सबै घटेको उल्लेख गर्दै उनले संघीयता बलियो बनाउने अधिकारसमेत सरकारले गुमाएको बताए। रिजालले स्वास्थ्य क्षेत्रमा २२, २३ अर्ब बजेट मात्रै छुट्याएर नपुग्ने पनि बताए। उनले कोरोना रोकथाम तथा नियन्त्रणका लागि छुट्याएको ६ अर्ब रूपैयाँले परीक्षण गर्न समेत नपुग्ने बताए।  रिजालले भने, “६ अर्ब परीक्षणका लागि खर्च हुन्छ। ६ लाखको खर्च गर्न सक्ने क्षमता छ ? क्षमता हुँदा अस्तिको जस्तै चलखेल हुन्छ भन्ने डर छ।” अझै पनि अर्थतन्त्रको उद्धारको काम कसरी गर्ने, राहतका काम कसरी गर्ने भन्ने समय बाँकी रहेको उनल बताए। “८३ पेजको दस्तावेजलाई बिर्सेर फेरि अबको अर्थतन्त्र उद्धारको काम कसरी गर्ने, राहतका काम कसरी गर्ने, नागरिकलाई घर घरसम्म कसरी पुर्&zwj;याउने भन्ने कुरा सोचौँ। त्यसका लागि साझा कुरा के हुन्छ भन्ने कुरा तर्फ लागौँ”, रिजालले भने, “साझा अठोटबाट अर्थतन्त्र कसरी बनाउन सक्छौँ भन्ने सोच्नुभयो भने अहिलेको परिस्थितलाई पनि हामी अवसरको रूपमा बदल्न सक्छौँ।”