महाराष्ट्रमा भाजपा गठबन्धनको सरकार बन्ने निश्चित, हरियाणामा गठबन्धन सरकार
<p>काठमाडौं। भारत महाराष्ट्रमा भएको विधानसभा निर्वाचनमा भारतीय जनता पार्टी र शिवसेना दलको राष्ट्रिय प्रजातान्त्रिक गठबन्धनले बहुमत प्राप्त गरेको छ।</p>
<p>महाराष्ट्र विधानसभाको कुल २८८ सीटमा २१ अक्टुबरमा भएको निर्वाचनमा हालसम्म भाजपाले १०५ स्थानमा विजय हाँसिल गरेको छ। शिवसेनाले ५६ सीट जितेको छ। </p>
<p>नतिजासँगै गठबन्धनका देवेन्द्र फादनावीस पुनः महाराष्ट्रको मुख्यमन्त्री बन्ने अनुमान भारतीय सञ्चारमाध्यमले गर्न थालेका छन्।</p>
<p>सन् २०१४ को विधानसभा निर्वाचनपछि महाराष्ट्रको मुख्यमन्त्री भएका फादनावीस भाजपा नेता हुन्। </p>
<p>भाजपा नेतृत्वको गठबन्धले विधानसभाको निर्वाचनमा ल्याएको मत परिणाम भने लोकसभा निर्वाचनको भन्दा कम रहेको बताइएको छ।</p>
<p>यसै वर्ष मे महिनामा सार्वजनिक भएको भारतको लोकसभाको निर्वाचनको नतिजामा भाजपा नेतृत्वको गठबन्धले महाराष्ट्रमा २२४ सीटमा विजय हाँसिल गरेको थियो।</p>
<p>अहिलेसम्म सार्वजनिक नतिजा अनुसार भाजपा गठबन्धनले महाराष्ट्र विधानसभाको निर्वाचनमा १५७ सीटमा मात्रै विजय हाँसिल गरेको छ।</p>
<p>गठबन्धनले करीब २४० सीटमा विजय हुने दाबी गरेको थियो। यस्तै कांग्रेस पार्टी र उसको गठबन्धन १०२ सीटमा विजय हाँसिल गरेको छ।</p>
<p>यस्तै २१ अक्टुबरमै भएको हरियाणाको विधानसभा निर्वाचनमा भाजपा ४० सीटमा विजयी भएको छ। कुल ९० सीटको विधानसभाको निर्वाचनमा ४० सीटमा विजयी भएको भाजपाले गठबन्धन सरकार बनाउन प्रयास गर्ने भएको छ। </p>
<p>सन् २०१४ मा हरियाणामा भएको विधानसभा निर्वाचनमा भाजपा ४७ सीटमा विजयी हुँदै बहुमतको सरकार गठन गरेको थियो। हरियाणामा भाजपाले ७५ सीट ल्याउने प्रारम्भिक दाबी गरे पनि ४० सीटमा खुम्चिएको हो।</p>
<p>हरियाणाको विधानसभाको निर्वाचनमा भारतीय कांग्रेसले राम्रो प्रदर्शन गर्न नसके पनि सन् २०१४ को विधानसभाको निर्वाचनको तुलनामा केही सुधारीएको प्रदर्शन गरेको भारतीय सञ्चारमाध्यमको दाबी छ।</p>
<p>कांग्रेसले ३१ सीटमा विजय हाँसिल गरेको छ भने अन्य पार्टीले १९ सीट ल्याएका छन्।</p>
<p><br />
</p>
प्रतिक्रिया दिनुहोस्
.jpg)
