जासुसीको आरोपमा भारतले गर्यो पाकिस्तानी अधिकारीलाई देश निकाला
<p>नयाँदिल्ली। भारतले पाकिस्तानका दुई कूटनीतिक अधिकारीलाई जासुसी गरेको आरोपमा ‘पर्सना नन ग्राटा’ अर्थात् देश छाडेर जाने आदेश दिएको छ।</p>
<p>उनीहरूलाई २४ घण्टाभित्र भारत छाडेर जाने आदेश जारी गरिएको हो। दुवैजना नयाँदिल्लीस्थित पाकिस्तानी उच्चायुक्तको कार्यालयमा कार्यरत छन्।</p>
<p>“उनीहरू हिजो गैरकानूनी क्रियाकलाप गरिरहेको अवस्थामा पक्राउ परेका थिए,” भारतीय विदेश मन्त्रालयले विज्ञप्तिमा भनेको छ, “त्यस्तो गतिविधि कूटनीतिक मर्यादाविपरीत हो।”</p>
<p>पाकिस्तानको विदेश मन्त्रालयले भने भारतीय विदेश मन्त्रालयको निर्णयमाथि आपत्ति जनाएको छ। उनीहरूमाथि स्थापित हुन नसक्ने झुटो आरोप भारतले लगाएको पाकिस्तानी विदेश मन्त्रालयको भनाइ छ।</p>
<p>“झुटो आरोप लगाउँदै आफ्ना कूटनीतिक कर्मचारीलाई नियन्त्रणमा लिएर यातना दिएकामा पाकिस्तान सरकार खेद व्यक्त गर्छ,” पाकिस्तानी विदेश मन्त्रालयको विज्ञप्तिमा उल्लेख छ।</p>
<p>त्यसको विरोधमा पाकिस्तानले इस्लामावादस्थित भारतीय कूटनीतिज्ञलाई बोलाएर आपत्ति प्रकट गरेको छ। इस्लामावादस्थित भारतीय उच्चायुक्तको कार्यालयका कूटनीतिक अधिकारीलाई पनि देश निकाला गर्ने पाकिस्तानले जनाएको छ।</p>
प्रतिक्रिया दिनुहोस्
.jpg)
