मोदीलाई नारायणकाजीको आग्रह- 'पशुपतिनाथको आशिर्वाद लिएर सच्चिनुस्'
<p>काठमाडौं। सत्तारुढ नेपाल कम्युनिष्ट पार्टी (नेकपा) का प्रवक्तासमेत रहेका सांसद नारायणकाजी श्रेष्ठले भारतीय प्रधानमन्त्री नरेन्द्र मोदीलाई पशुपतिनाथको आशिर्वाद लिएर अतिक्रमित नेपाली भूमि फिर्ता गरेर सच्चिन आग्रह गरेका छन्।</p>
<p>राष्ट्रिय सभा बैठकको विशेष समयमा बोल्दै श्रेष्ठले मोदी आध्यात्मिक व्यक्ति भएकाले पशुपतिनाथ र मुक्तिनाथसँग आराधना गरी सत्यको मार्गमा हिँड्ने शक्ति लिन सुझाए।</p>
<p>"सत्यको पक्षमा अडिग रहँदै नेपाल-भारत सम्बन्धलाई सुधार गर्ने ऐतिहासिक मौका नगुमाउन पनि उहाँलाई आग्रह गर्छु", श्रेष्‍ठले भने, ‘‘यो बेलामा पशुपतिनाथसँग, मुक्तिनाथसँग आराधना गर्नुहोस्। शक्ति लिनुहोस्। आशिर्वाद लिनुहोस् र यस्तो तपोभूमि, यस्तो पवित्र भूमिको एक इन्च भूमि पनि हामीले लिनु हुँदैन। हिजोको जुन अतिक्रमणकारी, कब्जा गर्ने प्रवृति रह्यो त्यसलाई सच्याएर सत्यको पक्षमा उभिन्छौँ र नेपाल- भारत सम्बन्ध सुधार गराउँछौँ भन्नुहोस्। नेपाल-भारतको सम्बन्धलाई अझ उचाइमा पुर्‍याउन सहयोग हुनेछ। तपाईजस्तो आध्यात्मिक व्यक्तिलाई आग्रह गर्न चाहन्छौँ।’’</p>
<p>इतिहासका तथ्य र प्रमाणहरू टेबुलमा राखेर समस्या समाधानका लागि नेपाल तयार रहेको बताउँदै श्रेष्‍ठले भारत सरकारले पनि यसलाई सकारात्मक रूपमा लिएर अगाडी बढ्नुपर्नेमा जोड दिए।</p>
<p>श्रेष्ठले इपीजी समूहले सहमतिमा नेपाल भारत सम्बन्ध, समस्या र समाधानका विषयमा तयार पारेको प्रतिवेदन भारतले बुझ्न नमानेको प्रति दुःख जनाए।</p>
<p>भारतसँगको असमान सन्धि सम्झौता खारेज गर्नुपर्ने उनको माग थियो।</p>
प्रतिक्रिया दिनुहोस्
.jpg)
