नेपालको ऊर्जा विकास र कोरोना प्रभावित क्षेत्रको पुनरुत्थानमा विश्व बैंकले स्वीकृत गर्यो १२ अर्ब ऋण
<p>काठमाडौं। विश्‍व बैंकले नेपालका लागि १० करोड अमेरिकी डलर (करीब १२ अर्ब रुपैयाँ) बराबरको ऋण स्वीकृत गरेको छ।</p>
<p>विश्‍व बैंकको कार्यकारी निर्देशकहरूको आज बसेको बैठकले नेपाललाई डेपलपमेन्ट पोलिसी क्रेडिटअन्तर्गत उक्त ऋण दिने निर्णय गरेको विश्‍व बैंकले जारी गरेको प्रेस विज्ञप्तिमा उल्लेख छ।</p>
<p>उक्त ऋण नेपालको विद्युत क्षेत्रको विकास र कोभिड-१९ का कारण क्षति पुगेको क्षेत्रको पुनरूत्थानमा खर्च गर्न सकिने छ।</p>
<p>उक्त ऋण सहयोगबाट नेपाल विद्युत प्राधिकरणको वित्तीय सक्षमता सुधार गर्न सहयोग मिल्ने बताइएको छ। यसबाट नेपालको जलविद्युत क्षेत्रको विकासमा सहयोग पुग्‍नुका साथै विद्युत प्राधिकरणलाई थप स्वायत्त, पारदर्शी र जवाफदेशी बनाउने गरी नियम ढाँचा तयार गर्न सहयोग पुग्‍ने विश्‍व बैंकले बताएको छ।</p>
<p>त्यसैगरी, नेपालको जलविद्युत स्रोतको अधिकत उपयोग गरी क्षेत्रीय बजार एकीकृत रूपमा उपयोग गर्न र संघीय प्रणालीमा नेपाल विद्युत प्राधिकरणलाई पुनर्संरचना गर्न सहयोग मिल्ने विश्‍व बैंकले जारी गरेको विज्ञप्तिमा उल्लेख छ।</p>
<p>“संकट र संकटपछिको अवस्थामा पनि नेपालको विद्युत क्षेत्रलाई सुदृढ पार्न निरन्तर सहयोग जारी रहनेछ,” विश्‍व बैंकको नेपालका लागि कन्ट्री म्यानेजर फेरिस हदाद जार्भोसले भनेका छन्।</p>
<p>सरकारले गरेको प्रतिवद्धताअनुरूप नेपालमा भरपर्दो, किफायती र टिकाउ हुने हिसाबले विद्युतको विकास हुने र त्यसले गरिबी निवारण र देशको समृद्धिमा सहयोग पुग्‍ने जार्भोसले बताए।</p>
<p>पछिल्लो समय नेपालमा विद्युत उत्पादनमा उल्लेख प्रगति भएको, प्रणाली चुहावटमा सुधार भएको र अन्तरदेशीय प्रसारण लाइनको क्षमता विकास भइरहेकाले देश लोडसेडिङ मुक्त भएको तथा कुल जनसंख्याको ८८ प्रतिशतमा विद्युतको पहुँच पुगेको विश्‍व बैंकले उल्लेख गरेको छ।</p>
<p>नेपालको स्थायी र बलियो सरकारले विद्युत क्षेत्रको विकास, प्राधिकरणको व्यवस्थापन सुधार, प्रणाली चुहावटमा नियन्त्रण र प्राधिकरणको नाफामा सुधारको काम गर्ने प्रतिवद्धता व्यक्त गरेको विश्‍व बैंकले उल्लेख गरेको छ।</p>
प्रतिक्रिया दिनुहोस्
.jpg)
