डाँफे संरक्षणमा जुटे म्याग्दीका स्थानीय सरकार
<p>म्याग्दी। म्याग्दीको उच्च हिमाली भेगका जङ्गलमा प्रशस्त मात्रामा पाइने नेपालको राष्ट्रिय पन्क्षी डाँफेको संरक्षणका लागि स्थानीयवासी सक्रिय भएका छन्।</p>
<p>समुद्र सतहदेखि तीन हजार मिटरभन्दा माथिल्लो क्षेत्रमा पाइने यो पन्क्षी म्याग्दीको अन्नपूर्ण र धौलागिरि गाउँपालिका क्षेत्रका जङ्गलहरूमा पाइने स्थानीयवासी बताउँछन्।</p>
<p>जमिनमा दौडने र थोरै मात्र उड्ने कुखुरा प्रजातिको डाँफेको संरक्षणका लागि धौलागिरि गाउँपालिकाले संरक्षण नीति नै बनाएर संरक्षणको कार्य गरिरहेको धौलागिरि गाउँपालिका–१, गुर्जाका वडाध्यक्ष झक छन्त्यालले बताए।</p>
<p>अन्नपूर्ण संरक्षण क्षेत्रअन्तर्गत पर्ने अन्नपूर्ण गाउँपालिका–५, शिखका वडाध्यक्ष दिनेशकुमार पुनले गाउँपालिकाका दर्जन बढी जङ्गलमा डाँफे देखिएको बताउँदै त्यसको संरक्षणका लागि अन्नपूर्ण संरक्षण क्षेत्र (एक्याप)सँग सहकार्य गरेर संरक्षण अभियान सञ्चालन गरिएको जानकारी दिए।</p>
<p>चराविद् कक्सले सन् १९९९ मा गरेको अनुसन्धानमा म्याग्दीको माथिल्लो क्षेत्रमा ७०० को हाराहारीमा डाँफे भेटिएको उल्लेख गरेका छन्।</p>
<p>सशस्त्र द्वन्द्वकालमा चोरी, शिकारी र आगलागीका कारण डाँफेको सङ्ख्या घटेकामा २०६५ सालयताको एक दशकको अवधिमा यसको सङ्ख्या दोब्बरले वृद्धि भएको स्थानीयवासीले बताएका छन्।</p>
<p>पाँच वर्षदेखि पन्क्षी तथा जङ्गली प्राणीहरूको खोज–अनुसन्धानमा लाग्नुभएका त्रिभुवन बहुमुखी क्याम्पस पाल्पाका प्राध्यापक केशव चोखालका अनुसार नेपालमा पाइने आठ प्रकारका थोरै उड्ने र जमिनमा दौडने पन्क्षीका प्रजातिमध्ये डाँफे सबैभन्दा आकर्षक र ठूलो प्रजातिको पन्क्षी हो ।</p>
<p>नेपालमा डाँफेको संख्या तीन हजार ५०० देखि पाँच हजारसम्म रहेको अनुमान गरिएको चोखालले बताए। </p>
<p>उनका अनुसार सन् १९७३ को वन तथा वन्यजन्तु ऐनमा यो पन्क्षीलाई संरक्षित वन्यजन्तुको सूचीमा सूचीकृत गरिएको छ।</p>
<p>यो पन्क्षी विशेषगरी नेपाललगायत अफगानिस्तान, पाकिस्तान, तिब्बत र भुटानमा पाइने गर्दछ। <em>रासस</em></p>
प्रतिक्रिया दिनुहोस्
.jpg)
