ग्रेटाले अस्वीकार गरिन् वातावरण पुरस्कार
<p>काठमाडौं। स्वीडेनकी १६ वर्षीया बालिका ग्रेटा थनबर्गले यो वर्षको वातावरण पुरस्कार अस्वीकार गरेकी छन्।</p>
<p>थनबर्गले ‘जलवायुसम्बन्धी आन्दोलनलाई कुनै पुरस्कारको आवश्यकता नभएको’ बताउँदै पुरस्कार लिन अस्वीकार गरेकी हुन्।</p>
<p>पुरस्कार लिन अस्वीकार गरेको जानकारी उनले आफ्नो इन्स्टाग्राममार्फत् दिएकी छन्।</p>
<p>पुरस्कार अस्वीकार गरे पनि उनले आफूलाई पुरस्कारको हकदार मान्ने नर्डिक काउन्सिललाई धन्यवाद ज्ञापन गरेकी छन्। ‘यो मेरा लागि ठूलो सम्मान हो,’ उनले भनेकी छन्।</p>
<p>यद्यपि उनले राजनीतिज्ञ र शक्तिमा रहेका मानिसले वर्तमान समयमा प्राप्त विज्ञानका विषयलाई सुन्नुपर्ने बताएकी छन्।</p>
<p>ग्रेटालाई यो वर्ष प्रदान गरिएको नोवेल शान्ति पुरस्कारका लागि प्रमुख दाबेदारका रूपमा हेरिए पनि इथियोेपियाका प्रधानमन्त्री अबी अहमदलाई उक्त पुरस्कार प्रदान गरिएको थियो।</p>
<p>आफ्नो इन्स्टाग्राम अकाउन्टमार्फत् पुरस्कार अस्वीकार गर्नुको कारण खुलाएकी ग्रेटाले भनेकी छन्, “जलवायु परिवर्तन र वातावरणीय विषयमा नर्डिक राष्ट्रको विश्वमा आफ्नै किसिमको सम्मान छ। यो विषयको बहसमा होस् अथवा सुन्दर शब्दको प्रयोगमा कुनै कमी छैन।” तर, नर्डिक राष्ट्रले उपयोग गर्ने उर्जाले ‘अर्को कथा बताइरहेको छ।’</p>
<p>संयुक्त राष्ट्रसंघको ७४औं महासभामा सहभागी ग्रेटाले विश्वका नेतालाई जलवायु परिवर्तनको विषयलाई मजाकका रूपमा हेरेको आरोप लगाएकी थिइन्। उक्त घटनापछि नै ग्रेटामाथि विश्वको नजर परेको हो।</p>
प्रतिक्रिया दिनुहोस्
.jpg)
