सम्झौता सकियो, पुल निर्माण शुरू भएन
<p>रुकुमपूर्व। सम्झौता अवधि सकिएको १६ महीना पुग्न लाग्दासम्म रुकुमपूर्वमा एक मोटरेबल पुल निर्माणको काम शुरु भएको छैन। </p>
<p>सिस्ने गाउँपालिका र सदरमुकाम रुकुमकोट जोड्ने पुल निर्माण गर्न ३१ असार २०७३ मा हेटौँडाको मृत सञ्जीवनी निर्माण सेवासँग सम्झौता भएको थियो।</p>
<p>सम्झौता अनुसार २०७५ को असार मसान्तसम्ममा पुल निर्माण गरिसक्नुपर्ने थियो। </p>
<p>सानीभेरी नदीमाथिको पुल निर्माणको काम शुरु नहुँदा सिस्ने गाउँपालिका-२, ३ र ४ का नागरिकलाई सदरमुकाम रुकुमकोट आवतजावत गर्न समस्या भएको छ। </p>
<p>नौ करोड २० लाख रूपैयाँ लागत रहेको सो पुलको निर्माण कार्य शुरु नगरेपछि सिस्ने गाउँपालिकाले निर्माण कम्पनीको ध्यानाकर्षण गराएको छ।</p>
<p>आफूहरुले पटक–पटक सम्बन्धित पक्षलाई पुल निर्माणको कामलाई गति दिन ताकेता गरिरहेको सिस्ने गाउँपालिका उपाध्यक्ष गोवर्धन बुढाले बताए। </p>
<p>पुल निर्माणको जिम्मा पाएको ठेकेदार कम्पनीले भने नदीको एकापट्टि सडक नपुगेकाले निर्माण सामग्री ढुवानीमा समस्या भएर काममा ढिलो भएको बताएको छ। <em>रासस</em><br />
</p>
प्रतिक्रिया दिनुहोस्
.jpg)
