Others

गृहपृष्ठ

त्रिभुवन अन्तर्राष्ट्रिय विमानस्थलमा एकै दिन २० उडान काठमाडौं। त्रिभुवन अन्तर्राष्ट्रिय विमानस्थलमा आज एकै दिन आन्तरिक र अन्तर्राष्ट्रिय गरी २० उडान भएका छन्। ती उडानमध्ये अन्तर्राष्ट्रियतर्फ सर्वाधिक १४ उडान भएको विमानस्थल कार्यालयले जनाएको छ। बन्दाबन्दीपछि यो हालसम्मकै बढी उडान हो। यी सबै उडान यात्रु चार्टर्ड तथा कार्गो हुन्। यसअघि हिजो अन्तर्राष्ट्रियतर्फ १० र आन्तरिकतर्फ सात यात्रु उद्धार तथा कार्गो उडान भएको थियो। अन्तर्राष्ट्रिय विमानस्थलमा ७ असारमा १६ र ६ असारमा १५ उडान भएको थियो।  आज नेपाल वायु सेवा निगमले अष्ट्रेलियाको सिड्नीबाट २५८, माल्दिभ्सबाट १४३, र थाइल्याण्डको बैंककबाट दुई उडानबाट क्रमशः ७८ र १२ नेपालीको उद्धार उडान गरी काठमाडौं ल्याएको छ। त्यस्तै हिमालय एअरलाइन्सले कतारको दोहाबाट १४४ र अबुधाबीबाट ५ नेपाली काठमाडौं ल्याएको विमानस्थलले जारी गरेको विज्ञप्तिमा उल्लेख छ। जजिरा एअरले कुवेतबाट १६० यात्रु ल्याएको छ।  त्यसैगरी नेपाली यात्रु लिन नेपाल एअरलाइन्सको जहाज माल्दिभ्सको जेधाह प्रस्थान गरेको छ भने हिमालय एअरलाइन्स कुबेत र साउदी अरेबियाको दमाम उडेको छ। सोही एअरलाइन्सको जहाजले चीनको चाङ्सामा दुई कार्गो उडानका लागि त्यसतर्फ प्रस्थान गरेको विमानस्थलद्वारा जारी विज्ञप्तिमा उल्लेख छ। आजै जजिराले कुवेत र हिमालयले चाङ्साबाट कार्गो उडान गरेका छन्। भोलि पनि अन्तर्राष्ट्रियतर्फ १० उडान हुने कार्यतालिका छ। दोहा, दमाम, अबुधावी जेधाह, कुवेत इस्तानबुल, जेधाह र जापानको नारितामा चार्टर्ड उडान हुनेछ। हिमालयले दमाम, कुबेत र अबुधाबीबाट समान सङ्ख्या १५४ यात्रु ल्याउनेछ भने टर्किस एअरलाइन्सले इस्तानबुलबाट दुई उडानमा २८० का दरले यात्रु ल्याउने विमानस्थलले जनाएको छ।