सेनामा भ्रष्टाचार छानबिन गर्न विशेष संयन्त्र, २४ अड्डा निगरानीमा
<p>काठमाडौं। नेपाली सेनाले आर्थिक हिनामिना भएको आशंकामा मातहतका अड्डामाथि आकस्मिक छानबिन थालेको छ।</p>
<p>जंगीअड्डाले त्यस्तो छानबिन गर्न निगरानी संयन्त्र (ओभरसाइट सेल) बनाएको छ।</p>
<p>जंगीअड्डाले सेनाका विभिन्न अड्डामा विनियोजित बजेट सदुपयोग भए/नभएको यकिन गर्न निरीक्षणाधिकृतको अध्यक्षतामा निगरानी सेल गठन गरेको आजको अन्नपूर्ण पोष्टमा समाचार छ।</p>
<p>सेनाका प्रवक्ता सहायक रथी विज्ञानदेव पाण्डेले निगरानी संयन्त्रले काम गर्न थालिसकेको बताए।</p>
<p>“आकस्मिक खटिएको टोलीले सेनाका विभिन्न निकायमा विनियोजित रकमको उचित खर्च भए/नभएको यकिन गर्नेछ,” पाण्डेले भने।</p>
<p>प्रधानसेनापति पूर्णचन्द्र थापाले सेललाई सेनाका जुनसुकै निकायमा आकस्मिक छानबिन गर्ने पूर्ण अधिकार दिएका छन्।</p>
<p>निरीक्षणाधिकृत कार्यालय प्रमुखको जिम्मेवारी उपरथी अशोक सिग्देलले पाएका छन्।</p>
<p>उपरथी सिग्देलले विभिन्न फरकफरक टोली बनाई शंकास्पद सैनिक अड्डामाथि छानबिन थालेका छन्।</p>
<p>टोलीले सम्बन्धित अड्डामा जानकारी नदिई आकस्मिक ढंगले छानबिन गर्नेछ।</p>
<p>सैनिक अस्पताल, सैनिक सामग्री प्राप्ति निर्देशनालय, इन्जिनियरिङ विभागलगायत बजेट बढी विनियोजित भएका दुई दर्जनबढी सैनिक अड्डा छानबिनमा तानिएका छन्। <br />
</p>
प्रतिक्रिया दिनुहोस्
.jpg)
