Others

गृहपृष्ठ

तनहुँका स्थानीय तहले ल्याए सात अर्बको बजेट तनहुँ। जिल्लाका १० स्थानीय तहले आगामी आर्थिक वर्ष ०७७/७८ का लागि करिब सात अर्ब रुपैयाँको बजेट सार्वजनिक गरेका छन्। चार नगरपालिका र ६ गाउँपालिकाले ६ अर्ब ९२ करोड ५२ लाख ८७ हजार रुपैयाँको अनुमानित बजेट सार्वजनिक गरेका हुन्। व्यास नगरपालिकाले एक अर्ब ५२ करोड ९७ लाख ५१ हजार, शुक्लागण्डकी नगरपालिकाले एक अर्ब सात करोड सात लाख ३७ हजार, भानु नगरपालिकाले ७८ करोड ९१ लाख १२ हजार, भिमाद नगरपालिकाले ५६ करोड ५३ लाख सात हजार, ऋषिङ गाउँपालिकाले ५९ करोड ९७ लाख २० हजार दुई सय ४०, बन्दीपुर गाउँपालिकाले ५८ करोड ३२ लाख ७१ हजार, आँबुखैरेनी गाउँपालिकाले ५७ करोड ३९ लाख सात हजार, म्याग्दे गाउँपालिकाले ४७ करोड ४२ लाख २४ हजार, देवघाट गाउँपालिकाले ४० करोड ७५ लाख ५८ हजार र घिरिङ गाउँपालिकाले ३३ करोड १७ लाखको बजेट सार्वजनिक गरेको हो। शुक्लागण्डकी नगरपालिकाले बाँझो जमिनलाई उत्पादनमूलक बनाउने नीति लिएको छ। नगर क्षेत्रभित्र बाँझो रहेका जमिनलाई उत्पादनमूलक क्षेत्रमा प्रयोग गरी कृषि उत्पादन तथा उत्पादकत्व वृद्धि गर्न कार्यक्रम ल्याइएको उपप्रमुख सविता रसाइलीले जानकारी दिइन्। नगरपालिकाको आफ्नै भूउपयोग नीति बनाइने र कृषिको व्यावसायिकीकरण र विविधीकरणमा जोड दिने योजना बनाइएको उनले जानकारी दिइन्। “वैदेशिक रोजगारबाट फर्किएका  बेरोजगार  युवालाई उनीहरुको  सीप, योग्यता, अनुभव र क्षमताको आधारमा युवा लक्षित कार्यक्रम सञ्चालन गरिनेछ,” उनले भनिन्। जिल्लाका स्थानीय तहले कृषि, स्वास्थ्य, रोजगारी, पूर्वाधार विकास लगायतलाई प्राथमिकतामा राखेर बजेट सार्वजनिक गरेका छन्। रासस