Others

गृहपृष्ठ

चितवनको कालिका र खैरहनीमा पनि देखियो सलह कीरा चितवन। पूर्वी चितवनको कालिका र खैरहनी नगरपालिकामा सलह कीरा देखिएका छन्।  प्रधानमन्त्री कृषि आधुनिकीकरण परियोजना कार्यान्वयन एकाइ चितवनका प्रमुख मेघनाथ तिमल्सेनाका अनुसार कालिका नगरपालिका-३ को दुई सय बिघा भन्ने स्थानको ९६ बिघामा र खैरहनी नगरपालिकाको पर्सामा कीरा देखिएको हो।  उनका अनुसार कालिकाका स्थानीयवासीले आज बिहान गुलेलीले हानेर तर्साएपछि त्यहाँ रहेको सो कीराका सानो झुण्ड वनतर्फ गएको छ। सो क्षेत्रमा परियोजना, कृषि ज्ञान केन्द्र र नगरपालिकाका कृषि प्राविधिकहरूले अध्ययन गरिरहेको तिमल्सेनाले बताए।  यसैगरी हिजो साँझ खैरहनी नगरपालिकाको पर्सा क्षेत्रमा आकाशमा सानो झुण्ड उडेको जानकारी स्थानीय कृषि प्राविधिकहरूले गराएका छन्।  भरतपुर महानगरपालिका र इच्छाकामना गाउँपालिका क्षेत्रमा पनि फाट्टफुट्ट रूपमा कीरा देखिएको छ।  आज बागमती प्रदेशको भूमि, व्यवस्था, कृषि तथा सहकारी मन्त्रालयमा सलह कीरा नियन्त्रणका लागि बैठक बस्&zwj;न लागेको छ। कृषि तथा वन विज्ञान विश्वविद्यालय, नेपाल कृषि अनुसन्धान परिषद्, सो परियोजना, केन्द्रलगायत संस्थाका विज्ञहरु र मन्त्रालयका उच्च अधिकारीका बीचमा  सो विषयमा छलफल हुने जनाइएको छ ।  मकै थन्काउने क्रम अन्तिम भएको भन्दै तत्काल थन्काउन, काट्दै गरेको चैते धान यथाशीघ्र काट्न, रोपाइँ भइरहेको ठाउँमा काम रोकेर नर्सरी जोगाउन, तरकारीका बेर्ना जोगाउन कृषकलाई अपील गरिएको कृषि ज्ञान केन्द्रका प्रमुख राजन ढकालले बताए। प्रमुख जिल्ला अधिकारी नारायणप्रसाद भट्टराईले सम्बन्धित कार्यालयका प्रमुखलाई कीरा रोकथाममा तत्काल जुट्न र के कस्तो सहयोग आवश्यक पर्छ भन्न निर्देशन दिइएको बताए। रासस