देउसी खेलेर पिक्निक जाँदा दुर्घटना, तीन बालिकाको मृत्यु
<p>दाङ। दाङमा देउसी खेलेर उठेको रकमले पिक्निक खान गएको टोली दुर्घटनामा पर्दा तीनजनाको मृत्यु भएको छ।</p>
<p>आज दिउँसो साढे ३ बजे गढवा गाउँपालिका–५, स्थित गढवा– कोईलाबास सडक खण्डको चिसापानीमा भएको ट्रयाक्टर दुर्घटनामा अरु २३ जना घाइते भएका छन्।</p>
<p>जिल्ला प्रहरी कार्यालय दाङका अनुसार गढवा–६ मनिकापुरबाट पिक्निक गएका २६ जना सवार रा १ त २३९३ नम्बरको ट्रयाक्टर दुर्घटनामा परेको थियो ।</p>
<p>सबै २६ जना घाइते भएको र त्यसमध्ये तीनजना बालिकाको गढवा स्वास्थ्यचौकीमा उपचारका क्रममा मृत्यु भएको प्रहरीले जनाएको छ।</p>
<p>मृत्यु हुनेमा मनिकापुरकी ११ वर्षीया निनु पुन, १२ वर्षीया सीमा परियार र १२ वर्षीया सुनिता पुनमगर छन्।</p>
<p>ट्रयाक्टर दुर्घटना हुँदा ट्रली पल्टिएको प्रहरीले जनाएको छ।</p>
<p>घाइतेमध्ये पाँचजनाको अवस्था गम्भीर छ।</p>
<p>गम्भीर घाइते हुनेहरूमा मनिकापुरकी १२ वर्षीया मनिका राना, १२ वर्षीय आकाश राना, ११ वर्षीय सुशील परियार, १२ वर्षीय आयुष शाह र १५ वर्षीया भीमाकुमारी घर्ती छन्।</p>
<p>उनीहरूलाई थप उपचारका लागि नेपालगन्ज रिफर गरिएकाे छ।</p>
<p>ट्रयाक्टर चालकलाई इलाका प्रहरी कार्यालय गढवाले नियन्त्रणमा लिएको छ।</p>
<p>
<p> </p>
</p>
प्रतिक्रिया दिनुहोस्
.jpg)
