जेलरको सरुवापछि बाँके कारागारका कैदीबन्दीले स्थगित गरे आन्दोलन
<p>काठमाडौं। कारागारका जेलरको सरुवा र नाइकेलाई हटाउनुपर्ने माग राखेर बाँकेको नेपालगन्ज कारागारका कैदीबन्दीले थालेको आन्दोलन स्थगित भएको छ।</p>
<p>प्रमुख जिल्ला अधिकारी, सुरक्षा निकायका प्रमुख, मानवअधिकारकर्मीलगायतको उपस्थितिमा भएको वार्तामा कैदीबन्दीले राखेका माग सम्बोधन गर्ने सहमतिपछि आन्दोलन स्थगित भएको हो।</p>
<p>आज नै कारागारका जेलर भरतराज पाण्डेको जिल्ला प्रशासन कार्यालयमा काज सरुवा गरिएको छ। कैदीबन्दीका नाइके भरत फडेरालाई अन्यत्र कारागार पठाइने भएको छ।</p>
<p>कैदीबन्दीले राखेका माग सम्बोधन भएपछि उनीहरूले आजैदेखि आफ्नो आन्दोलनका कार्यक्रम स्थगित गरेको कारागारका कर्मचारी बखतकुमार थापाले जानकारी दिए।</p>
<p>आज भएको वार्तामा नाइकेले कैदीबन्दीको रासन र दैनिक उपभोग्य वस्तुको खरिदमा अनियमितता गरेको सम्बन्धमा समेत छानबिन गर्ने सहमति भएको छ।</p>
<p>सहमतिपछि कैदीबन्दीले भित्रबाट लगाएको ताला पनि खोलेका छन्।</p>
<p>हिजो बिहानैदेखि कैदीबन्दीले आन्दोलन गरेका थिए। उनीहरूले बिहान केही घण्टा कारागारभित्रै नाराबाजी गरेका थिए।</p>
<p> </p>
प्रतिक्रिया दिनुहोस्
.jpg)
