सेनाका मेजरसहित ८ जना जुवाखालबाट पक्राउ
<p>काठमाडौं। गएराति काठमाडौंको सामाखुसीबाट जुवा खेलिरहेका नेपाली सेनाका एक मेजरसहित ८ जनालाई प्रहरीले पक्राउ गरेको छ।</p>
<p>उनीहरुको साथबाट १ लाख ५९ हजार रुपैयाँसमेत बरामद भएको छ।</p>
<p>सामाखुसीस्थित सोमबहादुर मगरको घरमा जुवा खेलिरहेको अवस्थामा सेनाका मेजर राजेन्द्र शाही, घरधनी सोमबहादुर मगर, रामेछापका बुद्धिलाल मगर, गोरखाका जित गुरुङ र किरणजंग शाह, टोखाका मानकाजी गुरुङ र धर्म शाह तथा सुर्खेतका निरज राणालाई पक्राउ गरिएको काठमाडौं प्रहरी परिसरका प्रमुख एसएसपी उत्तमराज सुवेदीले जानकारी दिए।</p>
<p>सुवेदीका अनुसार शाही प्रधानमन्‍त्रीको सुरक्षामा खटिएका सैनिक अधिकृत हुन्।</p>
<p>प्रहरीले शाहीलाई राति नै सैनिक मुख्यालयमा बुझाएको छ।</p>
<p>गम्भीर प्रकृतिको अपराधबाहेक अन्य अपराधमा संलग्न सैनिकलाई सैनिक ऐन अन्तर्गत कारबाही हुने कानूनी प्रावधान छ।</p>
<p>पक्राउ परेका अन्यलाई हिरासतमा राखेर कारबाही अघि बढाइएको प्रहरीले बताएको छ।</p>
<p>एसएसपी सुवेदीले <em>देखापढी</em>लाई भने, "आज बिदा भएकोले भोलि मात्रै अदालतमा म्याद थप गरेर कारबाही अघि बढ्छ।" </p>
प्रतिक्रिया दिनुहोस्
.jpg)
