भोजपुरमा प्रहरीद्वारा १० करोड मूल्यको गाँजा नष्ट
<p>भोजपुर। प्रहरीले भोजपुरको दक्षिणी क्षेत्र हतुवागढी र आमचोक गाउँपालिकामा स्थानीयले व्यवसायीक रूपमा लगाएको करीब ७५ हजार गाँजाको बोट नष्ट गरेको छ।</p>
<p>१४ कात्तिकदेखि हिजोसम्म नष्ट गरिएको गाँजा १० करोड मूल्यभन्दा बढीको रहेको जिल्ला प्रहरी कार्यालय, भोजपुरका प्रहरी प्रमुख डीएसपी नरबहादुर सलामी मगरले <em>देखापढी</em>लाई बताए।</p>
<p>हिजो दुई गाउँपालिकाका विभिन्न ठाउँमा ५१ रोपनी क्षेत्रफलमा लगाइएको १९ हजारबढी गाँजाको बिरुवा नष्ट गरिएको छ।</p>
<p>१६ कात्तिकमा हतुवागढी गाउँपालिका- ९ मुस्ताङ टोलको १४ हजार गाँजाको बोट प्रहरीले नष्ट गरेको छ।</p>
<p><img alt="" height="402" src="https://www.dekhapadhi.com/storage/photos/shares/Social/gaja nasta police 1.jpg" width="722" /></p>
<p>यसअघि पनि १४ कात्तिकमा प्रहरीले हतुवागढी–८, बारीगाउँ र ९ नम्बर वडा हसनपुरको मचुवाटार, कोल्टार क्षेत्रमा करीब ५५ रोपनी बाँझो पाखा बारी र ऐलानी जग्गामा स्थानीयले लगाएको साढे ४१ हजार गाँजाको बोट नष्ट गरेको थियो।</p>
<p>डीएसपी मगरको कमाण्डको टोलीले हिजो हतुवागढी– ९, हसनपुरस्थित मुस्ताङ र थुम्कीको करीब ३२ रोपनी क्षेत्रफलमा लगाइएको १२ हजार ५०० गाँजाको बोट नष्ट गरेको छ।</p>
<p>त्यस्तै आमचोक गाउँपालिका ८ स्थित हैखराङ र सिसवानीमा अन्दाजी ४ रोपनी जग्गामा लगाएको ५६० बोट गाँजा र वडा नम्बर ७ स्थित बसाई गाउँ, नेवार टोल र मगर टोलमा १५ रोपनी जग्गामा लगाएको छ हजार बोट गाँजा प्रहरीले काटेर जलाएको छ।</p>
<p>व्यवसायीक रूपमा लगाइएका ती गाँजा तराई हुँदै भारत तस्करी हुने पाइएको भोजपुरका प्रहरी प्रवक्ता प्रहरी निरीक्षक पाण्डव राजवंशीले बताए।</p>
<p>उनले भने, “प्रहरी त्यहाँ पुग्दा धेरैजसो युवाहरु गाउँ नै छाडेर भाग्छन्, बुढाबुढी र केटाकेटी मात्र घरमा हुन्छन्।” </p>
<p><br />
</p>
प्रतिक्रिया दिनुहोस्
.jpg)
