बेलायती संसद्मा नेपाल भ्रमण वर्षको प्रचार गरिने
<p>काठमाडाैं। बेलायती संसद्‍मा नेपाल भ्रमण वर्ष २०२० अभियानको प्रवर्द्धन गरिने भएको छ।</p>
<p>बेलायतस्थित हाउस अफ लर्ड्स (बेलायतको माथिल्लो सदन)मा भ्रमण वर्षको प्रचारप्रसार गर्न लागिएको भ्रमण वर्ष सचिवालयले जनाएको छ।</p>
<p>बेलायतको हाउस अफ लर्ड्समा भ्रमण वर्ष घोषणाका लागि संस्कृति, पर्यटन तथा नागरिक उड्डयनमन्त्री योगेशकुमार भट्टराई बेलायत पुगिसकेका छन्। </p>
<p>मन्त्री भट्टराईसँगै भ्रमण वर्ष सचिवालय र नेपाल पर्यटन बोर्डका पदाधिकारीको पनि सहभागिता छ।</p>
<p>प्रत्येक वर्ष हुने वर्ल्ड ट्राभल मार्केट (डब्लूटीएम) को अवसरमा बेलायतमा २१ कात्तिकमा हुने नेपाल भ्रमण वर्ष प्रवर्द्धनका लागि विशेष कार्यक्रम राखिएको सचिवालयले जनाएको छ।</p>
<p>विश्वकै ठूलो ‘ट्राभल सो’ मानिएको यो मेला आजदेखि शुरु भएको छ।</p>
<p>तीन दिनसम्म चल्ने मेलामा नेपालको समग्र पर्यटन प्रवर्द्धनका सामग्री तथा खानाका परिकारको समेत प्रदर्शनी गरिने बोर्डले जनाएको छ।</p>
<p>कार्यक्रमको मुख्य आकर्षण नेपालको पर्यटन विकास तथा प्रवर्द्धनमा योगदान दिने बेलायती नागरिकहरूलाई ‘दी हिमालयन ट्राभल अवार्ड २०१९’ बाट सम्मान गर्ने कार्यक्रम छ।</p>
<p>बेलायती चर्चित अभिनेत्री, लेखक तथा अभियानकर्मी जोआन्ना लुम्ले, भारतीय मूलका बेलायती राजनीतिज्ञ सन्दीपकुमार बर्मा र भारतीय मूलकै बेलायती धनाढ्य व्यापारी गोपीचन्द परमानन्द हिन्दुजालाई नेपाल भ्रमण वर्ष २०२० अभियानको सद्भावना दूत नियुक्त गर्ने कार्यक्रम छ। </p>
<p>त्यस्तै लामो समयदेखि नेपालमा पर्यटकहरू पठाउने प्रमुख बेलायती टूर अपरेटरहरूलाई कदर पत्र प्रदान गर्ने कार्यक्रमसमेत छ।</p>
<p>अवार्ड तथा कदरपत्र मन्त्री भट्टराईले वितरण गर्नेछन्।</p>
<p>त्यसैगरी ट्राभल एजेन्ट तथा होटेल व्यवसायी रमेश अरोरा, नेपालको पर्यटनमा अढाई दशकदेखि लागिपरेका मर्कस कट्टन, नेपालको वन्यजन्तु पर्यटनमा काम गर्दै आएका एभी जीम एडवार्ड, नेपालको पर्यटन गन्तव्यको प्रचारप्रसारमा लामो समयदेखि लागिपरेका रोबिन मार्सटन र नेपाल पर्यटनका अग्रणी कोलोनेल जोमलाई दी हिमालयन अवार्ड वितरण गरिनेछ।</p>
<p>त्यसैगरी नेपालको पर्यटन प्रवर्द्धनमा सहयोग गर्ने माइकल वेट (म्यानेजिङ डाइरेक्टर, रिभिएरा ट्राभल), आस्ले टफ (सीईओ, की एड्भेन्चर ट्राभल), पटेर बुर्रेल (एमडी, एक्सोडुल ट्राभल), रोबर्ट गुडवीन (प्रोडक्ट एन्ड पर्चेजिङ डाइरेक्टर), जेरल्डिन स्टिन्सन (म्यानेजिङ डाइरेक्टर, मर्करी होलिडेज), आन्डे स्वार्रेल (म्यानेजिङ डाइरेक्टर, टीटान ट्राभल) र स्टेभ बेरी (म्यानेजिङ डाइरेक्टर, माउण्टेन किङडम)लाई प्रशंसापत्र वितरण गरिने भ्रमण वर्ष सचिवालयले उल्लेख गरेको छ। <em>रासस</em></p>
प्रतिक्रिया दिनुहोस्
.jpg)
