भीमफेदी-कुलेखानी सुरुङमार्गको अध्ययन पूरा, माघमा टेन्डर
<p>हेटाैंडा। प्रदेश ३ को राजधानी हेटौंडा र संघीय राजधानी काठमाडौंको आवतजावतलाई सहज बनाउन प्रदेश सरकारले भीमफेदी–कुलेखानी सुरुङमार्गको प्राविधिक र कानूनी अध्ययन पूरा गरेको छ।</p>
<p>“माघको पहिलो सातासम्ममा टेण्डर आव्हान गर्ने तयारीमा छौं,” भौतिक पूर्वाधार विकास मन्त्रालयका सचिव तेजराज भट्टले भने, “मन्त्रालयका कर्मचारी र प्राविधिक त्यही काममा जुटिरहेका छन्।”</p>
<p>सचिव भट्टले तीन वर्षभित्र सुरुङमार्ग निर्माण भइसक्ने बताएका छन्। </p>
<p>सुरुङमार्गलाई प्रदेश सरकारले आफ्नो पहिलो वर्षको नीति तथा कार्यक्रममा गौरवको आयोजनाको रूपमा अगाडि सारेको थियो।</p>
<p>निजी कम्पनीको केन्द्र सरकारसँगको सम्झौता अवधि बाँकी नै रहेका कारण पहिलो वर्ष प्रदेशले उक्त मार्ग निर्माण गर्ने आधार बनाउन सकेन।</p>
<p>तर, यस वर्ष भने कानूनी तथा प्राविधिक तयारी पूरा गरेर प्रदेश सरकार आफैंले केन्द्र र स्थानीय तहसँग समेत सहकार्य गर्ने गरी काम शुरू गरेको छ।</p>
<p>भीमफेदी–कुलेखानीसम्मको सुरुङ ३ किलोमिटर लामो र १० मिटर चौडाइको हुनेछ।</p>
<p>उक्त सुरुङ निर्मण भएपछि हेटौंडाबाट राजधानी प्रवेश गर्ने जोखिमयुक्त मोटरबाटो पार हुनुका साथै करीब १५ किलोमिटर सडकको दूरी छोटिने आजको कान्तिपुरमा समाचार छ।</p>
<p>“करीब १२ अर्ब लगानीमा सुरुङमार्ग निर्माण गरिने प्रारम्भिक अनुमान गरेका छौं,” प्रदेश ३ का मुख्यमन्त्री डोरमणी पौडेलले भने। </p>
प्रतिक्रिया दिनुहोस्
.jpg)
