भारतको नक्साप्रति नेकपा र कांग्रेस नेताको आपत्ति
<p>सत्तारुढ नेपाल कम्युनिष्ट पार्टी (नेकपा) र प्रमुख प्रतिपक्ष नेपाली कांग्रेस दुवै दलका नेताहरुले भारत सरकारले जारी गरेको नयाँ नक्साप्रति आपत्ति जनाएका छन्।</p>
<p>उनीहरुले कुटनीतिक पहलमार्फत् यसलाई सच्याउन तत्काल पहल गर्नुपर्ने माग समेत गरेका छन्।</p>
<p>भारतले जारी गरेको नयाँ नक्सामा नेपाली भूभाग कालापानी, लिपुलेक र लिम्पियाधुरालाई भारतमा देखाइएको छ।</p>
<p>यो नक्साप्रति आपत्ति जनाउँदै नेकपाका स्थायी कमिटी सदस्य भीम रावलले मुलुकको भौगोलिक अखण्डताको रक्षा गर्न सरकारसँग माग गरेका छन्।</p>
<p>रावलले आज ट्वीटमार्फत् भनेका छन्– ‘नेपालको लिम्पियाधुरा लिपुलेक क्षेत्र भारत सरकारले नक्शामा भारतीय भूमि भनी देखाएकोप्रति नेपाल सरकारले आपत्ति गर्नुपर्छ । यसबारे नेकपा स्थायी कमिटीको र सर्वदलीय बैठक बोलाउनुका साथै कूटनीतिक माध्यमबाट तत्काल कुरा गरिनु पर्छ।”</p>
<p>नेपाली कांग्रेसका प्रवक्ता विश्वप्रकाश शर्माले पनि तत्काल यसबारे आफ्नो धारणा सार्वजनिक गरेर आवश्यक पहलकदमी लिन सरकारलाई आग्रह गरेका छन्।</p>
<p>“दिल्लीबाट जारी नयाँ नक्साप्रति गम्भीर ध्यानाकर्षण भएको छ”, शर्माले ट्वीटमार्फत् भनेका छन्, “सम्माननीय प्रधानमन्त्रीज्यू, कालापानी र लिपुलेक हाम्रा अभिन्न अंग हुन्।</p>
<p>नेपाल सरकारले तत्काल धारणा सार्वजनिक गरेर गम्भीर पहलकदमी गरोस्। नेपाली माटोका बारे कहीँबाट पनि उब्जिने प्रश्न आपत्तिजनक र अस्वीकार्य छ।”</p>
<p>नेपाली भूभाग भारतले अनधिकृत रुपमा कब्जा गरेको भन्दै राष्ट्रिय प्रजातन्त्र पार्टीले पनि आफ्नो भूभागको रक्षा गर्न र राष्ट्रियता जस्तो संवेदनशील विषयमा गम्भीर बन्न सरकारसँग माग गरेको छ।</p>
<p>प्रचार विभाग प्रमुख मोहन श्रेष्ठद्वारा जारी राप्रपाको विज्ञप्तिमा यसलाई कूटनीतिक ढंगबाट प्रतिवाद गर्न सरकारको ध्यानाकर्षण गराइएको छ।”</p>
प्रतिक्रिया दिनुहोस्
.jpg)
