इमर्जिङ टीम्स कप टोली घोषणा, कुशल पहिलो पटक टीममा
<p>काठमाडौ। बंगलादेशमा आयोजना हुने एसीसी इमिर्जिङ टीम्स एशिया कप २०१९ का लागि ज्ञानेन्द्र मल्लको कप्तानीमा नेपाली टीमको घोषणा भएको छ।</p>
<p>नेपाल क्रिकेट संघ क्यानले आज घोषणा गरेको टोलीमा कुशल भूर्तेल पहिलो पटक सिनियर टीममा परेका छन्।</p>
<p>यस्तै इशान पाण्डे र अभिनाश बोहरा पनि टीममा छन्।</p>
<p>यी दुई खेलाडीले यसअघि टी-२० खेले पनि नेपालका लागि ५० ओभरको खेल खेलेका छैनन्।</p>
<p>इमर्जिङ कप खेल्ने टोलीका अन्य खेलाडीमा उपकप्तान दीपेन्द्रसिंह ऐरी, शरद भेषावकर, सोमपाल कामी, करण केसी, विनोद भण्डारी, रोहितकुमार पौडेल, ललितनारायण राजवंशी, पवन सर्राफ, सन्दीप जोरा, सुसान भारी, आरिफ शेख छन्।</p>
<p>निवर्तमान कप्तान पारस खड्का र युवा लेगस्पीनर सन्दीप लामिछाने युएईमा टी-१० लिग खेल्न जाने भएकाले इमर्जिङ टीम्स कप गुमाउने भएका छन्।</p>
<p>दुवै खेलाडीले क्यानबाट टी-१० लिगका लागि नो अब्जेक्सन लेटर (एनओसी) प्राप्त गरिसकेका छन्।</p>
<p>यस्तै इमर्जिङ टीमका लागि नेपालबाट ५ अफिसियल जाने भएका छन्, जसमा क्यानका सदस्य प्रशान्त मल्ल टीम म्यानेजरका रूपमा छन्।</p>
<p>यस्तै मुख्य प्रशिक्षकमा उमेश पटवाल, सहायक प्रशिक्षकमा दीपेन्द्रप्रताप सिंह छन्।</p>
<p>यसैगरी भिडियो एनालिष्टमा रमन शिवाकोटी र फिजियोमा विक्रम न्यौपाने छन्।</p>
<p>इमर्जिङ कप १२ देखि २४ नोभेम्बरमा बंगलादेशमा हुनेछ।</p>
<p>नेपालले पहिलो खेल १४ नोभेम्बरमा भारतसँग खेल्नेछ।</p>
<p>नेपाल र भारतसँगै आयोजक बंगलादेश र हङकङ समूह 'बी' मा छन्।</p>
<p>यस्तै पाकिस्तान, श्रीलंका, अफगानिस्तान र ओमान समूह 'ए' मा छन्।</p>
प्रतिक्रिया दिनुहोस्
.jpg)
