बालविवाह रोक्न पुरोहितलाई कानूनी प्रशिक्षण
<p>सुर्खेत। प्रहरीले बालविवाह न्यूनीकरण गर्न कर्णालीका १० वटै जिल्लामा पुरोहितलाई कानूनी प्रशिक्षण दिएको छ। </p>
<p>प्रदेश प्रहरी कार्यालयको निर्देशनमा २० कात्तिकमा ती जिल्लाहरुमा विभिन्न धर्मगुरुलाई प्रशिक्षण दिएको हो।</p>
<p>प्रदेश प्रहरी प्रमुख एवं प्रहरी नायब महानिरीक्षक पूर्णचन्द्र जोशीले पुरोहितलाई कानूनीरूपमा सचेत गराउँदा बालविवाह न्यूनीकरणमा मद्दत पुग्ने बताए।</p>
<p>“विवाह गराउने मुख्य जिम्मेवारी पुरोहितहरुकै हो”, उनले भने, “अभिभावक र बालबालिका तयार भए पनि पुरोहितले कानूनी व्यवस्थालाई देखाएर विवाह गर्न इन्कार गरे त्यो विवाह नै हुन सक्दैन।” </p>
<p>कानूनले बालविवाहलाई अपराधको रुपमा परिभाषित गरेको छ। मुलुकी फौजदारी संहितामा बालविवाह गर्ने/गराउने व्यक्तिलाई तीन वर्षसम्म कैद र ३० हजार रुपैयाँसम्म जरीवाना हुने व्यवस्था छ।</p>
<p>प्रहरीले पुरोहितहरुलाई यही व्यवस्थाबारे जानकारी गराउन जिल्लामा प्रशिक्षण कार्यक्रम सञ्चालन गरेको हो।</p>
<p>प्रदेश प्रहरी प्रमुख जोशीले झण्डै ५०० हिन्दू, बौद्ध, मुस्लिम र इसाईका धर्मगुरुलाई बोलाएर कानूनी प्रशिक्षण दिएको जानकारी दिए।</p>
<p>प्रशिक्षणमा सुर्खेतमा १००, दैलेखमा ३९, कालिकोटमा ४१, जुम्लामा ५३, मुगुमा २५, हुम्लामा २३, डोल्पामा ५१, सल्यानमा ९२, जाजरकोटमा ३२ र रुकुमपश्चिममा २३ पुरोहित सहभागी थिए। <em>रासस</em><br />
<br />
</p>
प्रतिक्रिया दिनुहोस्
.jpg)
