Others

गृहपृष्ठ

साढे ४ करोड ठगी गर्ने २ इञ्जिनीयरसहित ६ जना पक्राउ काठमाडौं । नक्कली कागजात बनाएर चार करोड ६० लाख ठगी गरेको आरोपमा प्रहरीले छ जनालाई पक्राउ गरेको छ । राजमार्गसँग जोडिएको जग्गा देखाएर खोलाको बगर धितो राखी ठगी गरेको आरोपमा ६ जना पक्राउ परेका हुन् । काठमाडौं–३१ का सुरेन्द्र श्रेष्ठले सञ्चालन गरेको स्वर्णिम एण्ड श्रीजन कम्पनीको लागि नक्कली कागजात बनाएर बैंकबाट चार करोड ६० लाख कर्जा निकालिएको जिल्ला प्रहरी कार्यालय झापाका प्रवक्ता प्रहरी नायब उपरीक्षक महेन्द्रकुमार श्रेष्ठले जानकारी दिएका छन् । पक्राउ परेकामा इटहरीका एभरेष्ट कन्सल्टेन्सीका इञ्जिनीयर भेषराज खत्री, मोरङ बेलबारी–३ का इञ्जिनीयर कर्ण चामलिङ, हेटौंडा घर भई काठमाडौंको नयाँ बानेश्वरमा बस्दै आएका सुरेन्द्र श्रेष्ठ, काठमाडौं महराजगञ्जका भुपेन्द्र श्रेष्ठ, चितवन भण्डारा घर भई काठमाडौं नयाँ बानेश्वरमा बस्दै आएका ऋषिश्वर थपलिया, गाईघाट घर भइ काठमाडौंको चाबहिलमा बस्दै आएका कृष्ण कार्की रहेका छन् ।  “बैंकिङ कसुर र सरकारी छाप कीर्ते गरी नक्कली कागजात तयार गरेको अरोपमा उनीहरुलाई पक्राउ गरिएको हो”, प्रवक्ता श्रेष्ठले भने, “राजमार्गसँगै जोडिएको जग्गाको नक्कली नक्सा बनाएर खोलाको बगर धितो राखेको पाइयो ।”  उनीहरुले झापा कनकाई–९ स्थित कित्ता नं ३५९६ को ०–२–१० बिघा र कित्ता नं ३२७१ को ०–२–० बिघाको जग्गाको कीर्ते नक्सा तयार गरी खोला बगरको जग्गालाई राजमार्गमा जोडिएको जग्गा देखाएर ठगी गरेको श्रेष्ठले जानकारी दिए । पक्राउ परेकाहरुविरुद्ध असोज ६ गते जिल्ला प्रहरी कार्यालय झापामा मुद्दा दर्ता भएको थियो ।